Vizag | ఏపీలో అధికారం దక్కించుకున్న కూటమి ప్రభుత్వం ఇప్పుడు వైజాగ్ మేయర్ పీఠంపై కన్నేసింది. జీవీఎంసీపై పట్టుకోసం పావులు కదుపుతోంది. ఈ క్రమంలోనే వైసీపీ కార్పొరేటర్లను పార్టీలోకి లాక్కోవాలని ప్రయత్నిస్తోంది. ఈ క్రమంలోనే వైసీపీకి చెందిన సుమారు 22 మంది కార్పొరేటర్లు గ్రీన్ సిగ్నల్ ఇచ్చినట్లు తెలుస్తోంది. వీరిలో 12 మంది కార్పొరేటర్లు ఆదివారం నాడు వాళ్లు టీడీపీలో చేరు అవకాశం కనిపిస్తుంది. త్వరలోనే 9 మంది జనసేనలో చేరుతారని ప్రచారం జరుగుతోంది.
విశాఖలో పరిస్థితులు మారాయని.. అందుకే పార్టీ మారుతున్నామని 42వ వార్డు కార్పొరేటర్ ఉషశ్రీ వెల్లడించారు. తన డివిజన్ అభివృద్ధి కోసమే జనసేనలో చేరుతున్నానని ప్రకటించారు. ఇంకా చాలామంది పార్టీ మారతారని చెప్పారు. మేయర్ పీఠంపై ఈ ప్రభావం కచ్చితంగా ఉంటుందని తెలిపారు. ప్రస్తుతం జీవీఎంసీలో ఉన్న 98 కార్పొరేటర్లలో టీడీపీకి 27 మంది కార్పొరేటర్లు ఉన్నారు. జనసేనకు ముగ్గురు, బీజేపీకి ఒకరు, ఇండిపెండెంట్లు ముగ్గురు ఉన్నారు. ఇంకా జీవీఎంసీ పరిధిలో 8 మంది ఎమ్మెల్యేలు, ఇద్దరు ఎంపీలు ఉన్నారు. మొత్తంగా కూటమికి 45 మంది మద్దతు ఉంది. మరో ఐదుగురు సభ్యుల మద్దతు ఉంటే జీవీఎంసీలో కూటమికి మెజారిటీ లభిస్తుంది. అయినా సరే కౌన్సిల్లో పటిష్టంగా ఉండాలని భావించిన టీడీపీ నేతలు వైసీపీ నుంచి వచ్చేందుకు సిద్ధమైన 22 కార్పొరేటర్లనూ తీసుకోవాలని నిర్ణయించింది.
విశాఖ మేయర్పై అవిశ్వాసం పెట్టాలంటే మరికొంతకాలం ఎదురుచూడాల్సిందే. ఎందుకంటే.. మేయర్/మునిసిపల్ చైర్మన్ పదవుల్లో ఉన్న వారు నాలుగేళ్లు కొనసాగేలా వైసీపీ ప్రభుత్వం చట్టం చేసింది. అందువల్ల మేయర్ పదవిని టీడీపీ చేజిక్కించుకోవాలంటే అసెంబ్లీలో గతంలో చేసిన చట్టానికి సవరణ చేయాలి. అందుకు కొంత సమయం పడుతుంది. ఈలోగా జీవీఎంసీలో స్టాండింగ్ కమిటీలు కైవసం చేసుకోవాలని నిర్ణయించింది.