ఆదిలాబాద్, జూన్ 8(నమస్తే తెలంగాణ) : ప్రభుత్వ పాఠశాలల్లో పనిచేస్తున్న ఉపాధ్యా యుల బదిలీలు, పదోన్నతుల ప్రక్రియను ప్రభుత్వం చేపట్టింది. ఇందుకు సంబంధించిన షెడ్యూల్ విడుదలైంది. పలు కారణాలతో ఎనిమిది నెలలుగా నిలిచిన ప్రక్రియ శనివారం ప్రారంభమైనట్లయింది. షెడ్యూల్ ప్రకారం 8,9 తేదీల్లో సీనియారిటీ జాబితా వెల్లడి, 10,11 తేదీల్లో అభ్యంతరాల స్వీకరణ, 12 తేదీన సీనియారిటీ తుది జాబితా విడుదల కానుంది. ఈనెల 13 నుంచి 16వ తేదీ వరకు పదోన్నతులకు వెబ్ అప్షన్ల ఎంపిక, పదోన్నతుల కల్పన, ఈ నెల 17న ఎస్జీటీ సీనియారిటీ, ఖాళీల జాబితా ప్రదర్శిస్తారు. 18, 20 తేదీల్లో బదిలీల వెబ్ అప్షన్ల ఎంపిక అనంతరం 21, 22 తేదీల్లో ఉత్తర్వులు జారీ చేస్తారు. ప్రభుత్వం విడుదల చేసిన షెడ్యూల్లో ఎస్జీటీ, పండితులు, వ్యాయామ ఉపాధ్యాయులకు ప్రయోజనం చేకూరనుంది. రిటైర్మెంట్ మూడేళ్లలోపు ఉన్నవారికి తప్పనిసరి మినహాయింపు ఇచ్చారు. టెట్కు సంబంధం లేకుండా ఎస్జీటీలకు ప్రమోషన్లు కల్పించడంపై హర్షాతిరేకాలు వ్యక్తం అవుతున్నాయి.
ఆదిలాబాద్ జిల్లాలో 3,028 మంది ఉపాధ్యాయులు ఉండగా, 2,467 మంది విధులు నిర్వహిస్తున్నారు. జిల్లా వ్యాప్తంగా ఆయా కేటగిరీల్లో 300లకుపైగా ఖాళీలు ఉండే అవకాశాలున్నాయి. మొదటగా ఎస్జీటీలకు స్కూల్ అసిస్టెంట్గా ప్రమోషన్లు ఇచ్చిన తర్వాత బదిలీలు చేపడుతారు. బదిలీల కోసం గతంలో 2008 మంది ఉపాధ్యాయులు దరఖాస్తు చేసుకున్నారు. ఉపాధ్యాయుల సీనియారిటీ జాబితాను విద్యాశాఖ అధికారులు తయారు చేశారు. గతంలో ట్రాన్స్ఫర్ అయి రిలీవ్ కాకుండా ఉన్న స్కూల్ అసిస్టెంట్లు వారికి కేటాయించిన పాఠశాలల్లో చేరాలని ప్రభుత్వం ఉత్తర్వులు జారీ చేసింది. దీంతో జిల్లా వ్యాప్తంగా 260 మంది ఉపాధ్యాయులకు వారికి కేటాయించిన స్కూల్స్లో జాయిన్ కానున్నారు. శనివారం ప్రారంభమైన బదిలీల ప్రక్రియ ఈ నెల 22తో ముగియనుంది.