మంచిర్యాల, జూన్ 21 (నమస్తే తెలంగాణ ప్రతినిధి) : పదేళ్ల కేసీఆర్ పాలనలో పారిశ్రామికీకరణ పరుగందుకున్నది. అందుకు ప్రభుత్వం తెచ్చిన నూతన విధానాలే కాదు, నాణ్యమైన కరెంట్ కూడా ప్రధాన కారణంగా కనిపిస్తున్నది. ఉమ్మడి రాష్ట్రంలో పవర్హాలీడేలు, మరెన్నో ఆంక్షల మధ్యన మిల్లులు మూత పడే పరిస్థితి దాపురించగా, స్వరాష్ట్రం వచ్చిన తర్వాత వాటి సంఖ్య రెట్టింపు అయ్యింది.
తెలంగాణ రాక ముందు కరెంట్ కోసం మిల్లుల యజమానులు నరకయాతన పడ్డారు. కరెంట్ ఎప్పుడు వస్తుందో, ఎప్పుడు పోతుం దో తెలియని గందరగోళ పరిస్థితి ఉండేది. వారానికో తీరు షెడ్యూల్ అమలు చేసేవాళ్లు. ఆ షెడ్యూల్ ప్రకారంగానైనా కరెంట్ ఇచ్చేవాళ్లు కాదు. ఈ కారణంగా పరిశ్రమల నిర్వాహకులు తీవ్ర నష్టాలను చవిచూసేవాళ్లు. రాత్రి సమయంలో 8 గంటలు నుంచి 10 గంటలే కరెంట్ ఇచ్చేటోళ్లు. సాయత్రం పని మొదలైతే తెల్లవారు జాము దాకా చేసేటోళ్లు. హమాలీలు రాత్రంతా పని చేసి పొద్దంతా పడుకునేటోళ్లు. ఒళ్లంతా పుండు చేసుకొని ఆరోగ్యం పాడు చేసుకునేటోళ్లు.
కేసీఆర్ సీఎం అయ్యాక ఆ పరిస్థితి పోయింది. మిల్లులకు 24 గంటల నాణ్యమైన విద్యుత్ ఇచ్చారు. ఎప్పుడంటే అప్పుడు ధాన్యం పట్టించుకునే రోజులు వచ్చినయ్. గతంతో పోలిస్తే కేసీఆర్ హయాంలోనే మాకు మంచిరోజులు వచ్చినయని యజమానులు చెబుతున్నారు. 24 గంటల కరెంట్తో గడిచిన పదేళ్లలో మిల్లుల సంఖ్య పెరిగిందని, అలాంటి కేసీఆర్ను కరెంట్ ఏడ కొన్నరు.. ఎందుకు కొన్నరు.. అని ప్రశ్నించడం సరికాదని మండిపడుతున్నారు. కాంగెసోళ్లు ఇచ్చేది ఉండదు.. సచ్చేది ఉండదు కానీ అక్కరకు రాని పనులు చేస్తారని చెబుతున్నారు. కేసీఆర్ 24 గంటల కరెంట్ మీద తమ అభిప్రాయాలను వ్యక్తం చేశారు.
చెన్నూర్ రూరల్, జూన్ 21 : నేను చాలా ఏళ్లుగా రైస్ మిల్లు నిర్వహిస్తున్న. 2014 కంటే ముందు ఇష్టం వచ్చినట్లు కరెంట్ కోతలు పెట్టేటోళ్లు. గ్రామీణ ప్రాంతాల్లో పగలు ఒకవారం 8 గంటలు కోత, మరొక వారం రాత్రి 6 గంటల కోతలు విధించేటోళ్లు. తెలంగాణ రాష్ట్రం వచ్చి.. కేసీఆర్ ముఖ్యమంత్రి అయిన తర్వాత విద్యుత్ సరఫరాలో చాలా మార్పు వచ్చింది. అటు రైతులు, ఇటు గృహ అవసరా లకేగాక పరిశ్రమలకూ నిరంతరంగా మెరుగైన విద్యుత్ అందించారు. కోతలు లేని కరెంట్కు శ్రీకారం చుట్టింది కేసీఆర్ ఘనతే.
– కాళేశ్వరం సాగర్ గౌడ్, రైస్ మిల్లు యాజమాని, చెన్నూర్
భైంసాటౌన్, జూన్, 21 : నేను చాలా కాలం నుంచి రైస్మిల్ నడుపుతున్నా. 2014కు ముందు కరెంట్ కష్టాలు అనుభవించాం. 2014 తర్వాత కేసీఆర్ పాలనలో నిరంతర నాణ్యమైన కరెంటు అందివ్వడంతో సుఖంగా జీవించాం. ఇప్పుడు వేళాపాలా లేకుండా కరెంట్ కోతలు విధిస్తుండడంతో తీవ్రంగా నష్టపోతున్నాం. కరెంట్ కోతలతో చాలా సార్లు మిల్లింగ్ ఆపేయాల్సి వస్తున్నది. మిల్లింగ్ జరిగినా, జరగకపోయినా వారు మాట్లాడుకున్నంత కూలీలకు కూలి ఇవ్వాల్సిందే. దీంతో ఖర్చులు పెరగడంతో పాటు లాభాలు లేక నష్టపోతున్నాం. గతంలో నిరంతర, నాణ్యమైన విద్యుత్ను అందించేవారు.
-రూపేశ్, శ్రీ రాజరాజేశ్వర రైస్మిల్, వానల్పాడ్
భైంసాటౌన్, జూన్, 21 : తెలంగాణ రాష్ట్రం రాకముందు కరెంట్ ఎప్పుడు వస్తదో, ఎప్పుడు పోతదో తెలిసేది కాదు. ఇప్పుడు ఎప్పుడు పడితే అప్పుడు కరెంట్ కోతలు విధిస్తున్నారు. ఒక్కోసారి లోవోల్టేజీతో ట్రాన్స్ఫార్మర్లు కాలిపోతున్నాయి. తెలంగాణ రాష్ట్రం ఏర్పడ్డాక కేసీఆర్ విద్యుత్ సమస్య లేకుండా చర్యలు తీసుకున్నారు. పరిశ్రమల రంగానికి కోతలు లేకుండా కరెంట్ ఇచ్చారు. ఎన్నికల సమయంలో 24 గంటల కరెంట్ ఇస్తామని చెప్పి కాంగ్రెస్ ప్రభుత్వం ఇప్పుడు ఇష్టానుసారం కోతలు విధిస్తున్నది. దీంతో పరిశ్రమలు నడిపడం కష్టంగా మారింది. ఇప్పటికైనా గత ప్రభుత్వం మాదిరిగా నాణ్యతతో కూడిన నిరంతర విద్యుత్ను అందిస్తారని ఆశిస్తున్నాం.
-మహేశ్, సిద్ధేశ్వర రైస్మిల్, సుంక్లి