మంచిర్యాల ఏసీసీ, మే 14 : ఈవీఎంల భద్రత కోసం స్ట్రాంగ్ రూంల వద్ద మూడంచెల పటిష్ట భద్రత, బందోబస్తు ఏర్పాటు చేసినట్లు రామగుండం పోలీస్ కమిషనర్ ఎం. శ్రీనివాస్ అన్నారు. మంగళవారం పెద్దపల్లి పార్లమెంట్ మంచిర్యాల, బెల్లంపల్లి నియోజకవర్గాల ఈవీఎంల భద్రత కోసం హాజీపూర్ మండలం ముల్కల్ల ఐజా ఇంజినీరింగ్ కళాశాల, మంచిర్యాల స్ట్రాంగ్ రూంలను సందర్శించారు. భద్రత ఏర్పాట్లను పోలీస్ అధికారులతో కలిసి పరిశీలించారు.
ఈ సందర్భంగా ఆయన మాట్లాడుతూ స్ట్రాంగ్ రూంల దగ్గర 144 సెక్షన్తో పాటు మూడంచెల భద్రతా వ్యవస్థను అమలు చేస్తున్నట్లు పేర్కొన్నారు. పోలీసులు, ఆర్మ్డ్ రిజర్వ్, కేంద్ర బలగాలు స్ట్రాంగ్ రూంల వద్ద పహారా కాస్తున్నాయన్నారు. ప్రమాదాలకు, అవకాశం లేకుండా అగ్నిమాపక పరికరాలను సైతం అధికారులు అందుబాటులో ఉంచినట్లు తెలిపారు. సీసీటీవీ కెమెరాల ద్వారా నిరంతరం పర్యవేక్షణ ఉంటుందన్నారు. ఏసీపీ పర్యవేక్షణలో సీఐ, ఇద్దరు ఎస్ఐలతో పాటు సిబ్బందితో 24/7 విధులు నిర్వహిస్తారన్నారు. అనంతరం అధికారులకు పలు సూచనలు, ఆదేశాలను జారీ చేశారు. సీపీ వెంట మంచిర్యాల ఏసీపీ ప్రకాశ్, టాస్ ఫోర్స్ మల్లారెడ్డి, రామగుండం సీఐ అజయ్ బాబు, మంచిర్యాల రూరల్ సీఐ అశోక్, మంచిర్యాల మహిళా పోలీస్స్టేషన్ ఇన్స్పెక్టర్ వెంకట నర్సయ్య, ఎస్ఐలు ఉన్నారు.