నెన్నెల,జూలై 25 : విద్యార్థులకు ఎలాంటి ఇబ్బందుల్లేకుండా సత్వర మే ఏర్పాట్లు చేయాలని కలెక్టర్ కుమార్దీపక్ అధికారులను ఆదేశించారు. గురవారం మండలంలోని కుష్నపల్లి పాఠశాలను సందర్శించి తరగతి గదులను పరిశీలించారు. వర్షాలకు విద్యార్థులు తరగతి గదుల్లో గొడుగులు పట్టుకుని పాఠాలు వింటున్న తీరుపై పత్రికల్లో కథనాలు రాగా, ఆయన పాఠశాలను సందర్శించారు. తరగతి గదుల గోడలు, స్లాబ్ పూర్తిగా తడిసి ఉండటాన్ని గమనించారు. తరగతి గదులు చిత్తడిగా మారడంతో వరండాలో బోధన సాగిస్తున్నారు. తరగతి గదులు, స్లాబ్ను వెంటనే మరమ్మతులు చేయాలని ఇంజినీరింగ్ అధికారులను ఆదేశించారు. విద్యార్థులెవ్వరూ గదుల్లోకి వెళ్లకుండా చూడాలని సూచించారు. విద్యార్థులు పడుతున్న ఇబ్బందులను అడిగి తెలుసుకున్నారు. అనంతరం గిరిజన ఆశ్రమ పాఠశాలను తనిఖీ చేశారు. భోజన వసతితో పాటు వారికి అందిస్తున్న సౌకర్యాల గురించి విద్యార్థులను అడిగి తెలుసుకున్నారు. నెన్నెలలోని ఎంపీడీవో కార్యాలయంలో రికార్డులను పరిశీలించారు. తహసీల్దార్ కార్యాలయాన్ని తనిఖీ చేశారు. పీహెచ్సీని పరిశీలించి రోగులకు అందిస్తున్న వైద్య సేవల గురించి ఆరా తీవారు.ఆయన వెంట జిల్లా విద్యాధికారి, ఎంపీడీవో దేవెందర్ రెడ్డి, తహసీల్దార్ రమేశ్, ఎంఈవో మహేశ్వర్ రెడ్డి, ఆర్ఐ గణేశ్, ఎంపీవో శ్రీనివాస్ ఉన్నారు.
నెన్నెల, జూలై 25 : కుష్నపల్లి జడ్పీహెచ్ఎస్ స్కూల్ అసిస్టెంట్, ఇన్చార్జి హెచ్ఎం ఇంద్రసింగ్ను జిల్లా విద్యాశాఖ అధికారి యాదయ్య సస్పెన్షన్ చేస్తూ ఉత్తర్వులు జారీ చేశారు. తరగతి గదుల్లోకి వర్షపు నీరు రావడంతో విద్యార్థులు గొడుగులు పట్టుకొని కూర్చోవడంపై పత్రికల్లో కథనాలు రాగా, కలెక్టర్ కుమార్ దీపక్ గురువారం పరిశీలించారు. అదనపు గదులున్నా, అందులో కూర్చుండబెట్టకుండా.. కావాలని గొడుగులు పట్టించి నీరు లీకవుతున్న గదుల్లో కూర్చుండబెట్టిన కారణంగా సదరు స్కూల్ అసిస్టెంట్ను సస్పెండ్ చేస్తున్నట్లు డీఈవో యాదయ్య ఓ ప్రకటనలో తెలిపారు. ఈ విషయం తెలిసిన విద్యార్థుల తల్లిదండ్రులు అధికారుల తీరుపై మండి పడుతున్నారు. విద్యార్థుల సౌకర్యం కోసం ఆయన ఎంతో కృషి చేశాడని, అధికారులు గ్రామంలో ఉంటే పరిస్థితి ఏమిటో తెలిసేదని ఆగ్రహం వ్యక్తం చేస్తున్నారు.