Congress | మంచిర్యాల, డిసెంబర్ 11(నమస్తే తెలంగాణ ప్రతినిధి) : మంచిర్యాల జిల్లాలో కాంగ్రెస్ పార్టీ కొత్త తరహా కుట్రకు తెరలేపింది. ఎమ్మెల్యేలుగా గెలిచి వారం రోజులు కూడా దాటక ముందే జిల్లాలోని మున్సిపాలిటీలను ‘హస్త’గతం చేసుకునే దిశగా ఆ పార్టీ నాయకులు పావులు కదుపుతున్నారు. బెల్లంపల్లి, మంచిర్యాలలో తాజా రాజకీయ పరిణామాలు ఈ విషయాన్ని స్పష్టం చేస్తున్నాయి.
జిల్లా కేంద్రంలోని ఎమ్మెల్యే కాంగ్రెస్ గెలిస్తే మంచిర్యాలతోపాటు లక్షెట్టిపేట, నస్పూర్ మున్సిపాలిటీలను మొత్తం దక్కుంచుకుంటామని గతంలోనే పలుసార్లు సన్నిహితులు, అనుచరుల దగ్గర చెప్పినట్లు తెలిసింది. ఇప్పుడు ఆ దిశగా ఆయన పావులు కదుపుతున్నారనే ప్రచారం జరుగుతోంది. అసెంబ్లీ ఎన్నికల ఫలితాలు వెలువడిన రోజే మంచిర్యాలలో మూడు మున్సిపాలిటీలను కాంగ్రెస్ దక్కించుకుంటుందనే చర్చ జరిగింది. దానికి బలం చేకూరుస్తూ కాంగ్రెస్ ఇప్పుడు మున్సిపల్ కౌన్సిలర్ల పార్టీ ఫిరాయింపులను ప్రోత్సహిస్తున్నది. ఈ మేరకు ఇప్పటికే కొందరిని కాంగ్రెస్లో చేర్చుకున్న ఆ పార్టీ ఎమ్మెల్యేలు, మరికొందరు కౌన్సిలర్లకు గాలం వేసే పనిలో పడ్డారు.
బెల్లంపల్లి మున్సిపాలిటీలో కాంగ్రెస్ పార్టీకి ఊహించని షాక్ తగిలింది. అక్కడ కాంగ్రెస్ ఎమ్మెల్యే గెలవడంతో మున్సిపల్ చైర్మన్ పార్టీ మారి కాంగ్రెస్లో చేరారు. దీంతో మిగిలిన కౌన్సిలర్లు అదే దిశగా కాంగ్రెస్లో చేరతారనే చర్చ నడిసింది. కానీ.. బీఆర్ఎస్ కౌన్సిలర్లందరూ కలిసి చైర్మన్పై కలెక్టర్కు ఫిర్యాదు చేశారు. అవిశ్వాస తీర్మాణానికి డిమాండ్ చేశారు. ఇక్కడ మొత్తం 34 వార్డుల్లో 25 చోట్ల బీఆర్ఎస్ గెలిచింది. మూడు మాత్రమే కాంగ్రెస్ గెలిచింది.
అలాంటి పార్టీ ఇప్పుడు ఏకంగా మున్సిపాలిటీని చేతిలో పెట్టుకోవాలని చూస్తుండడంపై స్థానిక ప్రజానికం ఆగ్రహం వ్యక్తం చేస్తున్నారు. ఈ నేపథ్యంలో మంచిర్యాలలో ఇలాంటి పరిస్థితి పునరావృతం కాకుండా కాంగ్రెస్ నాయకులు జాగ్రత్తలు తీసుకుంటున్నట్లు తెలిసింది. మంచిర్యాల మున్సిపాలిటీలో ప్రస్తుతం బీఆర్ఎస్ పాలకవర్గం ఉంది. దీన్ని ఎలాగైనా చేజిక్కించుకోవాలని కాంగ్రెస్ చూస్తున్నది. అందుకే ఒకరిద్దరు కౌన్సిలర్లతో కాకుండా ఒకే సారి 20మందికిపైగా పార్టీలో చేర్చుకునేలా వ్యూహాలు రచిస్తున్నది.
రెండు రోజుల క్రితం కాంగ్రెస్లో చేరేందుకు వెళ్లిన ఇద్దరు కౌన్సిలర్లకు కొద్ది రోజులు వేయిట్ చేయండి. ఇంకా చాలా మంది బీఆర్ఎస్ నుంచి వచ్చి కాంగ్రెస్లో చేరుతారని చెప్పినట్లు తెలిసింది. అలా మొత్తానికి ఎలాగైనా మంచిర్యాల మున్సిపాలిటీని దక్కించుకోవాలని చూస్తున్నట్లు తెలిసిందే. ఇదే ఫార్ములాను అటు నస్పూర్, లక్షెట్టిపేటలోనూ అమలు చేస్తారనే ప్రచారం సాగుతోంది. ఏడాదిలో ముగిసే పదవీ కాలానికి కూడా కాంగ్రెస్ ఇలా చేయడం జనాలకు మింగుడుపడటం లేదు. అసెంబ్లీ ఫలితాల అనంతరం హుందాగా బీఆర్ఎస్ వ్యవహరిస్తే, కాంగ్రెస్ మాత్రం ఈ తరహా రాజకీయాలు చేయడం చర్చనీయాంశంగా మారింది.