మంచిర్యాలటౌన్, జూన్ 23 : మంచిర్యాలలో ఐటీ, ఇండస్ట్రియల్ పార్కుల ఏర్పాటుకు కృషి చేస్తున్నానని మంచిర్యాల ఎమ్మెల్యే కే ప్రేంసాగర్రావు పేర్కొన్నారు. ఆదివారం మంచిర్యాల వ్యవసాయ మార్కెట్ కమిటీ పాలకవర్గ ప్రమాణ స్వీకార మహోత్సవానికి ముఖ్య అతిథిగా హాజరై మాట్లాడారు. వేంపల్లి గ్రామ శివారులో ఐటీ, ఇండస్ట్రియల్ పార్కులు ఏర్పాటు చేసేందుకు యత్నిస్తున్నానని,
అడుగగానే వేంపల్లి గ్రామస్తులు సంతోషంగా ముందుకు వచ్చారన్నారు. బసంత్నగర్లో విమానాశ్రయం ఏర్పాటు చేయాలని ప్రయత్నాలు మొదలుపెట్టినట్లు తెలిపారు. తద్వారా యువతకు ఉపాధి అవకాశాలు మెరుగుపడుతాయని చెప్పుకొచ్చారు. మంచిర్యాల జిల్లాను ఉత్తర తెలంగాణకే ఆర్థిక రాజధానిగా చేయాలన్న సంకల్పంతో ముందుకెళ్తున్నట్లు తెలిపారు. మంచిర్యాల పట్టణాన్ని కార్పొరేషన్ చేస్తానని, మంచిర్యాల, నస్పూరు పట్టణాలు అమృత్ పథకంలో ఎంపికయ్యాయన్నారు.
మంచిర్యాల వ్యవసాయ మార్కెట్ కమిటీ పాలకవర్గం ఆదివారం కొలువుదీరింది. మార్కెటింగ్ శాఖ జిల్లా అధికారి గజానన్.. మార్కెట్ కమిటీ చైర్మన్గా నియమితులైన పయ్యావుల పద్మ -ముని, వైస్ చైర్మన్ బండారి సుధాకర్, సభ్యులు ఎండీ తాజమ్ముల్ అహ్మద్, వొన్నోజుల శ్రీనివాస్, పల్లపు సా విత్రి, బదావత్ రమేశ్నాయక్, సూరంసతీశ్, తనుగుల సత్యనారాయణ, నారిశెట్టి సంతోష్, దోనేపల్లి లింగయ్య, ధర్ని మల్లేశ్, జనార్దన్, మహేశ్కుమార్ జాజు, రావుల మహేశ్, రామారావుల చేత ప్రమాణం స్వీకారం చేయించారు. నూతనంగా ఎన్నికైన వారు ఎమ్మెల్యే పీఎస్సార్, డీసీసీ అధ్యక్షురాలు సురేఖను సన్మానించారు. మంచిర్యాల మున్సిపల్ చైర్మన్ ఉప్పలయ్య, బ్లాక్ కాంగ్రెస్ అధ్యక్షుడు పూదరి తిరుపతి, పట్టణ కాంగ్రెస్ అధ్యక్షుడు తూముల నరేశ్, మహిళా కాంగ్రెస్ అధ్యక్షురాలు పెంట రజిత, హేమలత, తదితరులు పాల్గొన్నారు.