ఆదిలాబాద్, జూన్ 25(నమస్తే తెలంగాణ) : “అర్హులైన రైతులందరికీ ఎకరాకు రూ.15 వేల చొప్పున పెట్టుబడి సాయం అందించాలి. పదెకరాలు పైబడిన రైతులకు, ఆర్వోఎఫ్ఆర్(అటవీ భూములు) పట్టాలు కలిగి ఉన్న పదెకరాలలోపు గిరిజనులకు రైతుభరోసా ఇవ్వాలి. ఇచ్చే డబ్బులను కేసీఆర్ మాదిరిగా సాగుకు ముందే ఇస్తే విత్తనాలు, ఎరువులు కొనుగోలు చేసుకోవడం సులభం అవుతుంది. గతంలో మాదిరిగా విత్తనాలు, వ్యవసాయ పనిముట్లను సబ్సిడీపై అందించాలి. రేషన్ కార్డు నిబంధన విధించవద్దు. పట్టా పాసు పుస్తకం ఉన్న వారికి సాయం అందించాలి.” అని రైతులు సూచనలు చేశారు. కాంగ్రెస్ ప్రభుత్వం మంగళవారం రైతు భరోసా పథకం అమలులో భాగంగా వ్యవసాయశాఖ మంత్రి తుమ్మల నాగేశ్వర్రావు వ్యవసాయ శాఖ అధికారులు, రైతులతో వీడియో కాన్ఫరెన్స్ నిర్వహించారు. రైతువేదికల్లో రైతులు తమ అభిప్రాయాలను వెల్లడించారు.
నామమాత్రంగా నిర్వహణ
ఆదిలాబాద్ నియోజకవర్గానికి సంబంధించి జైనథ్.. బోథ్ నియోజకవర్గానికి సంబంధించి బోథ్, ఇచ్చోడ.. ఖానాపూర్ నియోజకవర్గానికి సంబంధించి ఇంద్రవెల్లి రైతు వేదికల్లో వీడియో కాన్ఫరెన్స్(వీసీ)లు ఏర్పాటు చేశారు. అన్ని వీడియో కాన్ఫరెన్స్లు కూడా నామమాత్రంగా కొనసాగాయి. జైనథ్లో నిర్వహించిన వీసీకి జైనథ్, బేల, ఆదిలాబాద్ అర్బన్, ఆదిలాబార్ రూరల్, మావల మండలాలకు చెందిన రైతులు హాజరుకావాల్సి ఉండగా జైనథ్, బేల మండలాల రైతులు మాత్రమే కనిపించారు. ఇంద్రవెల్లిలో నిర్వహించిన వీసీలో ఇంద్రవెల్లి, ఉట్నూర్, నార్నూర్ మండలాలకు చెందిన రైతులు పాల్గొనాల్సి ఉండగా.. ఇంద్రవెల్లి రైతులు ఉన్నారు. బోథ్లో నిర్వహించిన కార్యక్రమంలో బోథ్, బజార్హత్నూర్, నేరడిగొండ మండలాల రైతుల హాజరుకావాల్సి ఉండగా.. కేవలం స్థానిక రైతులు కనిపించారు. ఇచ్చోడలో నిర్వహించిన వీసీలో ఇచ్చోడ, గుడిహత్నూర్, సిరికొండ, తాంసి, తలమడుగు, భీంపూర్ మండలాల రైతులు రావాల్సి ఉండగా చుట్టు పక్కల రెండు మండలాల రైతులు వచ్చారు. వ్యవసాయశాఖ అధికారులు, సిబ్బంది ఎక్కువ సంఖ్యలో హాజరయ్యారు. వీడియో కాన్సరెన్స్లో రైతుల నుంచి సలహాలు, సూచనలు సేకరించాల్సి ఉండగా.. ప్రతి నియోజకవర్గంలో ఒక్కో రైతుకు మాత్రమే మాట్లాడే అవకాశం కల్పించారు. ఇచ్చోడలో అసలు మాట్లాడే అవకాశం రాలేదు. దీంతో అక్కడి వచ్చిన అన్నదాతలు ఆగ్రహం వ్యక్తం చేశారు.
సీజన్కు ముందే వేయాలి..
ప్రభుత్వం రైతు భరోసా పథకంలో భాగంగా ఎకరానికి రూ.15 వేల సాయం అమలు చేయాలి. సాగులో ఉండి, 10 ఎకరాల పైబడి ఉన్న రైతులకే ఇవ్వాలి. యేటా వానకాలం, యాసంగి సీజన్కు ముందుగానే రైతుల బ్యాంకు ఖాతాల్లో డబ్బులు జమ చేయాలి. దీంతో విత్తనాలు, ఎరువులు కొనుగోలు చేసి సరైన సమయంలో విత్తనాలు నాటే అవకాశం కలుగుతుంది. రైతులందరికీ రేషన్కార్డులు లేనుందున ఆహారభద్రత కార్డు నిబంధనలు పెట్టవద్దు. పట్టాపాసు పుస్తకం ఉన్న రైతులకు పథకం వర్తింపచేయాలి.
– గణేశ్ యాదవ్, రైతు, జైనథ్, ఆదిలాబాద్
అర్హులందరికీ అందించాలి..
కేసీఆర్ ప్రభుత్వం ప్రతి రైతుకు భూమితో సంబంధం లేకుండా ఎన్ని ఎకరాలున్న రైతుబంధు ఇచ్చింది. ఇప్పుడు కాంగ్రెస్ ప్రభుత్వం రైతు భరోసా ఇవ్వడం కోసం విధి విధానాలు, పరిమితులు పెడుతున్నది. వ్యవసాయ భూములను లేవుట్ భూములు, రియల్ ఎస్టేట్స్ భూములను కట్ చేసి సాగు చేస్తున్న రైతుకు భూమితో సంబంధం లేకుండా అందించాలి.
– సోందావాడే నారాయణ, సోంపెల్లి, సిరికొండ మండలం
షరతులు లేకుండా చూడాలి..
కడెం, జూన్ 24 : రాష్ట్ర ప్రభుత్వం షరతులు లేకుండా రైతు భరోసా ఇవ్వాలి. ఇన్ని ఎకరాల వరకు లిమిట్ అని కాకుండా ఇవ్వాలి. కేసీఆర్ తీసుకొచ్చిన పెట్టుబడుల సహాయంతోనే చాలా మంది వలసలు మాని, స్వగ్రామంలో వ్యవసాయం చేసుకుంటున్నారు. ఈ తరుణంలో షరతులతో కూడిన భరోసా అంటే రైతులు తిరిగి వలస బాట పట్టే ప్రమాదం ఉంది. కేసీఆర్ ప్రభుత్వం ఇచ్చిన మాదిరిగానే రైతులకు భరోసా ఇవ్వాలి.
– దానవేణి రవి, రైతు, పెద్దూర్, కడెం మండలం.
పని ముట్లను సబ్సిడీపై ఇయ్యాలె..
బోథ్, జూన్ 25 : పదెకరాలు పైబడిన రైతులందరికీ రైతు భరోసా పథకం వర్తింపజేయాలి. అలాగే ఆర్వోఎఫ్ఆర్(అటవీ భూములు) పట్టాలు కలిగి ఉన్న గిరిజన పదెకరాలలోపు రైతులకు కూడా ఇవ్వాలి. ఈ సహాయాన్ని విత్తనాలు వేసే సమయంలో అందిస్తే ప్రయోజనకరంగా ఉంటుంది. గతంలో మాదిరిగా విత్తనాలు సబ్సిడీపై అందిస్తే బాగుంటుంది. వ్యవసాయ పనిముట్లను కూడా సబ్సిడీపై అందించాలి.
– ఇదాపు రాకేశ్, రైతు, కన్గుట్ట, బోథ్ మండలం.
రైతు భరోసా త్వరగా ఇవ్వాలి..
ఇచ్చోడ, జూన్ 25 : కాంగ్రెస్ ప్రభుత్వం ఎన్నికల్లో ప్రతి రైతుకు సీజన్కు ఎకరాకు రైతుభరోసా కింద రూ.7,500 ఇస్తామని హామీ ఇచ్చారు. వర్షాకాలం మొదలైన సందర్భంగా విత్తనాలు తదితర ఖర్చుల కోసం త్వరగా రైతుభరోసా డబ్బులు బ్యాంకు ఖాతాలో జమ చేయాలి. భూ పరిమితి లేకుండా ప్రతి రైతుకు గత ప్రభుత్వం ఇచ్చినట్లు రైతు భరోసా అందజేయాలి.
– సిడాం జైవంత్రావ్, బాదిగూడ, ఇచ్చోడ మండలం