కౌటాల/వాంకిడి/చింతలమానేపల్లి/కోటపల్లి/వేమనపల్లి/పెంచికల్పేట్/శ్రీరాంపూర్/సిర్పూర్(టీ)/కెరమెరి, జూలై 25 : వారం రోజులుగా జిల్లాలో వర్షం కురుస్తున్నది. కౌ టాల మండలంలోని కుంటలు, చెరువులు, ఒర్రెలు, వాగులు, నదులు నిండుగా మారా యి. మండల కేంద్రంలోని ప్రధానరోడ్డు చిత్తడిగా మారింది. వాంకిడి మండలంలో వాగులు, వంకలు ఉధృతంగా ప్రవహిస్తుండడంతో శివారు గ్రామాలకు రాకపోకలు నిలిచిపోయాయి. గిరిజనులంతా గ్రామాలకే పరిమితమయ్యారు. వాగుల వైపు వెళ్లవద్దని మండల అధికారులు, పోలీసులు హెచ్చరిస్తున్నారు. బంబార జీపీ పరిధిలోని ఆర్అండ్బీ రోడ్డు నుంచి గోండ్కోసార, ఇంద్రానగర్, బీ కోసార గ్రామలకు వెళ్లే దారి చిత్తడిగా మారింది. చింతలమానేపల్లి మండలంలోని దిందా-శివపెల్లి, నాయికపుగూడ గ్రామాలకు రాకపోకలు నిలిచిపోయాయి. దిందా-శివపెల్లి గ్రామాలు జలదిబ్బంధంలోనే ఉన్నాయి. దిందా-కేతిని వాగు ఉధృతంగా ప్రవహిస్తున్నది. శివపెల్లికి వెళ్లే మార్గ మధ్యలో వాగు నిండుగా ప్రవహిస్తున్నది. బాబాసాగర్ అర్కగూడ ప్రాజెక్టు నిండుకుండలా మారింది. ప్రాణహితకు భారీగా వరద వస్తుండడంతో గూడెం అంతర్రాష్ట్ర వంతెన వద్ద ప్రాణహిత ఉధృతంగా ప్రహిస్తున్నది. బ్యాక్ వాటర్తో గూడెం, దిందా, చిత్తామ, కోయపల్లి, దిందా గ్రామాల్లోని రైతుల పంట పొలాల్లోకి నీరు చేరింది. ప్రాణహిత ఉధృతికి కోటపల్లి మండలంలోని రైతులకు భారీ నష్టం వాటిల్లింది. పరీవాహక ప్రాంతాల్లో పంటలు నీటిలోనే ఉండిపోయాయి. పత్తి మొలక దశలో ఉండగా, పరిస్థితి ఏంటోనని రైతులు ఆందోళన చెందుతున్నారు. వెంచంపల్లి నుంచి దేవులవాడ వర పరీవాహక గ్రామాల్లోని పంటలు నీట మునగగా, ఇప్పటికే వ్యవసాయ శాఖ అధికారులు సందర్శించారు. ప్రాథమికంగా నష్టాన్ని అంచనా వేశారు.
వేమనపల్లి మండలంలో ప్రాణహిత ఉధృతంగా ప్రవహిస్తుండడంతో ప్రజలు అప్రమత్తంగా ఉండాలని ఎస్ఐ శ్యామ్పటేల్ సూచించారు. సుంపుటం-వేమనపల్లి మధ్య లోలెవల్ వంతెనపై వరద ప్రవహిస్తుండడంతో దారి మూసివేశారు. జాజులపేట గ్రామానికి చెందిన గర్భిణి దన్నూరి భారతి వైద్యం కోసం చెన్నూర్ దవాఖానకు తన భర్త మహేశ్తో వెల్తుండగా, రోడ్డుపై నీరు భారీగా ప్రవహించడంతో 108 అంబులెన్స్ సిబ్బంది, నీల్వాయి ఎస్ఐ శ్యామ్ పటేల్ వారిని సురక్షితంగా అంబులెన్స్లో ఎక్కించి పంపించారు. పెంచికల్పేట్ మండలంలోని పెద్దవాగు, ఉచ్చమల్లివాగు, బొక్కివాగు ఉధృతంగా ప్రహిస్తున్నాయి. పరీవాహక ప్రాంత పంటలు నీట మునిగాయి. అంతర్గత రోడ్లు బురదమయంగా మారాయి. మేర గూడ గ్రామానికి కాలినడకన కూడావెళ్లలేని పరిస్థితి నెలకొన్నది. సింగరేణి ఓసీపీ(ఉపరితల) గనులపై వర్షం తీవ్ర ప్రభావం చూపుతున్నది. పెన్గంగ పరీవాహక మాకిడి, జక్కాపూర్, హుడ్కులీ, వెంకట్రావ్పేట్, పారిగాం, లోనవెల్లి, తదితర గ్రామాల ప్రజలు అప్రమత్తంగా ఉండాలని సిర్పూర్(టీ) ఎస్ఐ దీకొండ రమేశ్ సూచించారు. వెంకట్రావ్పేట్ అంతర్రాష్ట్ర వంతెనను పరిశీలించారు. మండలంలోని హుడ్కులీ సమీపంలో లిఫ్ట్ ఇరిగేషన్ ట్యాంక్పై పెన్గంగా బ్యాక్ వాటర్లో చిక్కుకున్న ఓ వృధ్ధుడిని ఎస్ఐ దీకొండ రమేశ్ రక్షించారు. ట్యాంక్ సమీపంలో గోపాల్.. వలస వచ్చి తాత్కాలికంగా నివాసం ఉంటున్నాడు. పెన్గంగ ఉప్పొంగడంతో ట్యాంక్ పైకి ఎక్కాడు. అంతలోనే ట్యాంక్ చుట్టు నీరు చేరడంతో అక్కడే చిక్కుకున్నాడు. సమాచారం తెలుసుకున్న ఎస్ఐ అక్కడికి వెళ్లి, గోపాల్ను తాడుసాయంతో రక్షించారు. కెరమెరి మండలం సాంగ్వీ సమీపంలోని కల్వర్టు పైనుంచి ప్రవహిస్తున్న వరదనీటిని ఎస్ఐ విజయ్ జేసీబీ సాయంతో చెత్త తొలగించి, ప్రవాహాన్ని తగ్గించారు. రవాణా మార్గాన్ని మెరుగుపర్చారు. సింగరేణి వ్యాప్తంగా ఓసీపీల్లో ఉత్పత్తి, ప్రైవేట్ కాంట్రాక్టు సంస్థలకు అప్పగించిన మట్టి తవ్వకాలు, రవాణా పూర్తిగా నిలిచిపోయింది. 30 శాతం మాత్రమే బొగ్గు ఉత్పత్తి జరగుతున్నట్లు తెలుస్తున్నది. శ్రీరాంపూర్ ఓసీపీలో మెయింటనెన్స్ పనులు నిర్వహిస్తున్నారు. శ్రీరాంపూర్ ఓసీపీలో రోజుకు 9 వేల టన్నులు, ఇందారం ఓసీపీలో 3500 టన్నుల ఉత్పత్తికి ఆటంకం కలుగుతున్నది.