“మా అమ్మ కమలాదేవి పేరు మీద బోయపల్లి శివారులో 41 గుంటలు ఉండె. ఎన్హెచ్-363లో పోయింది. ఆ భూమికి చదరపు మీటరుకు రూ.350 చొప్పున రూ.17 లక్షల పరిహారం ఇచ్చిన్రు. మా పక్కన ఉన్న భూమి వాళ్లకు మాత్రం చదరపు మీటరుకు రూ.1317 ఇచ్చిన్రు. ఇదెక్కడి న్యాయమని జాయింట్ కలెక్టర్కు దరఖాస్తు పెట్టుకున్న. అప్పుడు ఆర్బిట్రేషన్ గురించి ఎవ్వరూ చెప్పలే. మాకు తెల్వదు. ఇప్పుడు ఆర్బిట్రేషన్ పెట్టుకుంటేనే పరిహారం పెరుగుతుందంటున్నరు. అది కూడా మూడేళ్లు దాటింది.. ఇగ ఇవ్వమంటున్నరు. ఇది సరైంది కాదు. అందరిలాగే మాకు కూడా పరిహారమివ్వాలె.” అంటూ తాండూరు మండలం బోయపల్లికి చెందిన దాసరి రఘు కోరుతున్నాడు. ఈయనలాగే అనేక మంది రైతులు తమకు న్యాయం చేయాలని వేడుకుంటున్నారు.
మంచిర్యాల, జూలై 26 (నమస్తే తెలంగాణ ప్రతినిధి) : మంచిర్యాల నుంచి మహారాష్ట్రలో ని చంద్రాపూర్ వరకు నిర్మించిన నేషనల్ హైవే -363 ఇటీవలే ప్రారంభమైంది. మంచిర్యాల జిల్లా కేంద్రం నుంచి బెల్లంపల్లి, తాండూర్ మీ దుగా ఆసిఫాబాద్ జిల్లాను తాకుతూ (94 కి లోమీటర్లు) వెళ్లే ఈ నేషనల్ హైవేను నాలుగు లేన్లుగా విస్తరించారు. ఈ మేరకు 2020లో భూసేకరణ చేపట్టారు. ఈక్రమంలోనే చాలా మంది రైతులు వ్యవసాయ భూములను కో ల్పో యారు. అప్పటి ప్రభుత్వ ధరను అనుసరించి నష్టపరిహారం చెల్లించి భూములు సేకరించారు.
ఇక్కడి వరకు బాగానే ఉన్నా.. నష్టపరిహారం మనిషికో తీరు, రైతుకో తీరున చె ల్లించారంటూ భూములు కోల్పోయిన రైతులు ఆరోపిస్తున్నారు. తాండూర్ మండలం బోయపల్లికి చెందిన ఓ రైతుకు చదరపు మీటరుకు రూ.350 చొప్పున చెల్లించి, ఈ రైతు పక్కనే భూమి ఉన్న మరో రైతుకు మాత్రం చదరపు మీటరుకు రూ.1317 చొప్పున చెల్లించారు. బోయపల్లి, కన్నాల, రేపల్లెవాడ గ్రామాల్లో 30 నుంచి 40 మంది రైతులకు ఎక్కువ పరిహారం ఇచ్చి, మిగిలిన వారి నోట్లో మట్టికొట్టారంటూ రైతులు వాపోతున్నారు. ఇప్పటికైనా తమకు న్యాయం చేయాలని వేడుకుంటున్నారు.
ఎందుకు తేడా వచ్చింది..
రైతులు కోల్పోయిన భూమికి పరిహారం ఇచ్చినప్పుడు అందరికీ ఒకే తరహాలో చెల్లించాలి కదా.. ఎందుకు వ్యత్యాసాలు వచ్చాయని ఆరా తీస్తే& సరైన అవగాహన లేని కారణంగా అనేక మంది రైతులకు తక్కువ పరిహారం వచ్చి నష్టపోయినట్లు తెలిసింది. 2020లో భూ సేకరణ చేసి, రైతుల ఖాతాల్లో డబ్బులు వేశారు. రైతుల నుంచి భూమిని సేకరించేందు అప్పుడున్న జిల్లా అదనపు కలెక్టర్ నోటీసులు ఇచ్చారు. దీంతో చాలా మంది రైతులు జాయింట్ కలెక్టర్కు దరఖాస్తులు పెట్టుకున్నారు.
మా భూములకు మార్కెట్ ధర ఎక్కువగా ఉందని, ఆ ప్రకారం పరిహారం ఇవ్వాలం టూ వినతులు సమర్పించారు. వీరిలో కొం దరు రైతులు (పరిహారం ఎక్కువ తీసుకున్న వారు) కలెక్టర్కు ఆర్బిట్రేషన్ పెట్టుకున్నారు. దీనిపై మిగిలిన రైతులకు అవగాహన లేకపోవడంతో జాయింట్ కలెక్టర్కు దరఖాస్తులు చేసుకుంటూ వచ్చారు. కలెక్టర్కు ఆర్బిట్రేషన్ పెట్టుకున్న రైతులకు పరిహారం మూడు నుంచి నా లుగు రెట్లు ఎక్కువ వచ్చింది. మిగిలిన వారికి గవర్నమెంట్ ధరను అనుసరించి, నిబంధనల మేరకు పెంచి తక్కువ ధర కట్టించారు.
దీంతో మిగిలిన రైతులు మా నుంచి దరఖాస్తులు తీసుకున్న జాయింట్ కలెక్టర్ ఒక్కసారి కూడా ఆర్బిట్రేషన్ చేసుకోవాలని చెప్పలేదంటున్నా రు. ముందే చెప్పి ఉంటే మిగిలిన వారిలా తా ము ఆర్బిట్రేషన్ పెట్టుకునేవారమని.. తమకు చెప్పలేదని ఆవేదన వ్యక్తం చేస్తున్నారు. నాలుగేళ్లు అయ్యాక 20న కలెక్టర్ పిలిచి మీరంతా జాయింట్ కలెక్టర్కు దరఖాస్తు చేసుకున్నారని, ఆర్బిట్రేషన్ చేసుకుంటే పరిహారం ఎక్కువ వచ్చేదని, ఇప్పుడు ఏం చేయలేమని చెప్పారని బాధితులు అంటున్నారు. ఇన్ని రోజులు చెప్పకుండా& ఇప్పుడు చెప్తే ఏం చేయాలంటూ తలలు పట్టుకుంటున్నారు.
గడువు ముగిసింది..
భూ సేకరణ చేశాక.. కలెక్టర్ ఆర్బిట్రేషన్ చేసుకోడానికి గడువు ఉంటుంది. భూ సేకరణ జరి గి, రైతుల ఖాతాల్లో పరిహారం డబ్బులు పడ్డా క మూడేళ్ల 90 రోజుల్లో ఆర్బిట్రేషన్ చేసుకోవ చ్చు. కానీ ఇప్పుడు ఆ సమయం లేదు. జా యింట్ కలెక్టర్కు దరఖాస్తులు చేసుకున్నప్పు డే చెప్పి ఉంటే ఆర్బిట్రేషన్కు వెళ్లే వారిమని, ఇప్పుడు ఏం చేయాలో తెలియడం లేదని రై తులు అంటున్నారు. ఈ విషయమై న్యాయవాదులను సంప్రదిస్తే డిలే ఫిటిషన్ వేసేందుకు అవకాశం ఉందంటున్నారు. కాకపోతే కచ్చితం గా న్యాయం జరుగుతుందా అంటే.. మాత్రం గ్యారంటీ ఇవ్వలేకపోతున్నారు. దీంతో రైతులు ఆందోళన చెందుతున్నారు. ఇప్పటికైనా అధికారులు స్పందించి తమకు ఎలాగోలా న్యాయం చేయాలని కోరుతున్నారు.