ఆదిలాబాద్, నిర్మల్ జిల్లాల్లో బుధవారం ఉరుములు, మెరుపులు, ఈదురుగాలులతో కూడిన వర్షం కురిసింది. కొనుగోలు కేంద్రాల్లో ఆరబెట్టిన వడ్లపై కప్పిన టార్పాలిన్లు గాలికి లేచిపోయాయి. తాత్కాలికంగా వేసిన రేకుల షెడ్డు కూలింది. వడ్ల కుప్పల మధ్య వర్షపు నీరు నిలిచింది. తలమడుగు మండలంలోని ఉండం గ్రామంలో 33/11 కేవీ విద్యుత్ స్తంభం నేలకొరిగింది. తాంసిలో కొబ్బరి చెట్టు కూలి ఇంటిపై పడడంతో ఇల్లు ధ్వంసమైంది. మార్కెట్ యార్డులో జొన్నలు తడవడంతో ఇబ్బందులు పడ్డారు. కుంటాల మండంలోని కొనుగోలు కేంద్రాల వద్ద తూకానికి తెచ్చిన ధాన్యాన్ని వర్షం నుంచి కాపాడుకోవడానికి రైతులు ఆగచాట్లు పడ్డారు. ఇచ్చోడ మండలంలోని ముక్రా(బి)లో ఇంటి పైకప్పు రేకులు ఎగిరిపోయాయి.
నిర్మల్ పట్టణంలో చెట్లు, హోర్డింగ్లు ఊగిపోవడంతో ప్రజలు భయబ్రాంతులకు గురయ్యారు. ధాన్యంపై కవర్లను కప్పేందుకు రైతులు పరుగులు తీశారు. నార్నూర్ మండలానికి సరుకులు, కూరగాయలు కొనుగోలు చేసేందుకు సంతకు వచ్చిన ప్రజలు, చిరువ్యాపారస్తులు ఇబ్బంది పడ్డారు. ప్రస్తుతం జొన్న పంట చేతికి రావడంతో వర్షాలతో తీవ్ర నష్టం వాటిల్లుతుందని రైతులు ఆందోళన చెందుతున్నారు. ఇంద్రవెల్లి మండలంలోని మామిడిగూడ గ్రామానికి చెందిన పలువురి ఇండ్ల పైకప్పులు, రేకులు ఊడిపోయాయి.
దీంతో ఇండ్లల్లో వర్షపు నీరు చేరడంతో నిత్యావసర సరుకులు, ఇతర వస్తువులు తడిశాయి. వడగాం రింగ్రోడ్డు మార్గంలో చెట్లు రోడ్డుపై పడిపోవడంతో రాకపోకలకు అంతరాయం ఏర్పడింది. బోథ్ మండలంలో విద్యుత్ స్తంభాలు, చెట్లు నేలకొరిగాయి. కాగా.. ఇప్పటికే రోజు ఆరబెడుతూ ఎండలో కష్టపడుతున్న రైతులు వర్షానికి మళ్లీ వడ్లు తడిసిపోయే సరికి నిరుత్సాహం చెందుతున్నారు. తేమ తగ్గే వరకు ఆరబెట్టాలంటే మరో నాలుగు రోజు పడుతుందని ఆవేదన చెందుతున్నారు. చేతికొచ్చిన పంట వర్షాలు కురియడంతో నష్టం వాటిల్లుతుందని ఆవేదన వ్యక్తం చేస్తున్నారు. తేమ ఉన్న వడ్లు కొనాలని రైతులు డిమాండ్ చేస్తున్నారు.
– నమస్తే నెట్వర్క్