బంగాళాఖాతంలో ఏర్పడిన వాయుగుండం కారణంగా మంచిర్యాల, కుమ్రం భీం ఆసిఫాబాద్ జిల్లాల వ్యాప్తంగా మూడు రోజులుగా వర్షాలు కురుస్తున్నాయి. దీంతో కుంటలు, వాగులు, ఒర్రెలు వరదనీటితో నిండుగా ప్రవహిస్తున్నాయి. చాలా చోట్ల రోడ్లన్నీ బురదమయమయ్యాయి. ఎడతెరపి లేని వర్షానికి ప్రజలకు బయటకు రాకపోగా వాగులు ఉప్పొంగడంతో కొన్ని గ్రామాలు జలదిబ్బంధంలో ఉండిపోయాయి. అధికార యంత్రాంగం ప్రజలకు పలు సూచనలు జారీ చేస్తున్నది. అవసరమైతేనే బయటకు రావాలని, జాగ్రత్తలు పాటించాలని సూచించింది.
ఆసిఫాబాద్ అంబేదర్చౌక్, జూలై 21 : ఆదివారం జిల్లా వ్యాప్తంగా 63.3 మి.మీ. వర్షపాతం నమోదైంది. జైనూర్లో 85.4, సిర్పూర్ (యూ)లో 75.2, లింగాపూర్లో 108.2, తిర్యాణిలో 55.0, రెబ్బెనలో 42.4, ఆసిఫాబాద్లో 81.0, కెరమెరిలో 59.8, వాంకిడిలో 72.2, కాగజ్నగర్లో 26.6, సిర్పూర్(టీ)లో 34.2, కౌటాలలో 61.2, చింతలమానేపల్లిలో 74.8, బెజ్జూర్లో 56.4, పెంచికల్పెట్లో 62.6, దహెగాంలో 54.4 మి.మీ నమోదైంది. ఆసిఫాబాద్ మండలం అడ గ్రామంలోని కుమ్రం భీం ప్రాజెక్టుకు భారీగా వరద వచ్చి చేరుతున్నది. ప్రాజెక్ట్ పూర్తి సామర్థ్యం 10.393 టీఎంసీలు కాగా, ప్రస్తుతం ప్రాజెక్ట్లోకి 3,258 క్యూ సెకుల నీరు వస్తున్నది. దీంతో అధికారులు 4, 5, 6వ నంబర్ గేట్లను 0.50 మీటర్ల మేర ఎత్తి, అంతే మోతాదులో నీటిని దిగువకు విడుదల చేస్తున్నారు.
మంచిర్యాల జిల్లా కేంద్రానికి సమీపంలోని క్వారీలో జరిగిన జాతరలో వర్షం కారణంగా జనాలు తీవ్ర ఇబ్బందులుపడ్డారు. మరోవైపు అవసరముంటే తప్ప ప్రజలు బయటకు రావద్దని పోలీసులు సూచిస్తున్నారు.
తాండూర్ మండల కేంద్రంతో పాటు, ప ల్లెల్లో వీధులన్నీ చిత్తడిగా మారాయి. ఉపాధి కూలీల పనులు నిలిచిపోయాయి. వివిధ పనులకు వెళ్లే వారికి ఆటంకం కలిగింది. మరో 2, 3 రోజులు వర్షాలు కురిసే అవకాశం ఉందని వాతావరణ శాఖ పే రొంది. అధికారులు ప్రజలకు అందుబాటులో ఉండాలని వెబెక్స్ ద్వారా కలెక్టర్ ఆదేశించారు. అనుమతి లేకుండా సెలవులు తీసుకోవద్దని, విధులు నిర్వర్తించే ప్రాంతం నుంచి వెళ్లొద్దని స్పష్టంచేశారు.
వేమనపల్లి మండల ప్రజలు అప్రమత్తంగా ఉండాలని నీల్వాయి ఎస్ఐ శ్యామ్పటేల్ సూచించారు. ముల్కలపేట నుంచి రాచర్ల వెళ్లే మార్గంలో కొత్తగా నిర్మించిన హై లె వెల్ వంతెన వద్ద అప్రోచ్ రోడ్డు కుంగిపో యి, నెర్రెలువారింది. ప్రమాదకరంగా మారడంతో ఈ మార్గాన్ని మూసివేశారు. రాచర్ల, వెంచపల్లి, సూపాక, జనగామ, ఆలుగామ గ్రామాలకు రవాణా సౌకర్యం నిలిచిపోయిందన్నారు. సమస్యలుంటే పోలీసులకు తెలియజేయాలన్నారు.
చింతలమానేపల్లి మండలం బాబాసాగర్లోని అర్కగూడ ప్రాజెక్టు నిండి, మత్తడి దుంకుతున్నది. దీంతో నాయికపు గూడకు రాకపోకలు నిలిచిపోయాయి. దిందా-కేతిని వాగు ఉప్పొంగడంతో మూడోరోజూ దిందా ప్రజలు జలదిగ్బంధంలో ఉన్నారు. లోతట్టు ప్రాంతాల్లో వర్షపు నీరు రోడ్లపై చేరింది. ప్రజలను అధికారులు ఎప్పటికప్పుడు అప్రమత్తం చేస్తున్నారు. డబ్బా జీపీ పరిధి బారెగూడ గ్రామస్తులు.. తమ కాలనీలోని బుదర రోడ్డుపై వరినాట్లు వేసి నిరసన తెలిపారు. సైడ్ డ్రైనేజీలు లేకపోవడంతో రోడ్లపై నీరు నిలిచి, బురదమయం గా తయారవుతున్నాయన్నారు. ప్రజా ప్ర తినిధులు, అధికారుల దృష్టికి తీసుకెళ్లినా పట్టించుకోవడం లేదని ఆవేదన వ్యక్తం చేశారు. గ్రామస్తులు విలాస్, బాపురావు, నికోడె శ్రీనివాస్, విలాస్, టాకిరె వగు, చౌదరి శంకర్ తదితరులు పాల్గొన్నారు.
పెంచికల్పేట్ మండలంలోని పెద్దవాగు, ఉచ్చమల్లి వాగు, బొకివాగు మత్తళ్లు ఉప్పొంగి ప్రవహిస్తున్నాయి. పలు గ్రామాల్లో పంట చేలు నీటమునిగాయి. అంతర్గత రోడ్లు బురదమయంగా మారాయి. ప్రజలు అప్రమత్తంగా ఉండాలని అధికారులు సూచించారు. కొండపల్లిలో గొల్లవాగుపై శిథిలావస్థలో ఉన్న లోలెవల్ వంతెనలో పూజారి హనుమంతుకు చెందిన కోడె ప్రమాదవశాత్తు పడి మృతి చెందింది. గొల్లవాగు ఉధృతంగా ప్రవహిస్తుండగా, అటుగా మేతకు వెళ్లిన కోడె వంతెనలో ఇరుక్కుపోయింది. యువకుడు పల్లెం పురుషోత్తం, పలువురు యువకులు బయటకు తీసినా, అప్పటికే చనిపోయింది. దాని విలువ రూ.30 వేలు ఉంటుందని, ప్రభుత్వం ఆదుకోవాలని హనుమంతుకు వేడుకున్నాడు.
కోటపల్లి మండలంలోని ఎసన్వాయి గ్రామానికి వెళ్లే రోడ్డు కోతకు గురైంది. వరద తాకిడికి తెగిపోయే స్థితిని వచ్చింది. ప్రస్తుతం ఈ మార్గంలో బైకుల ద్వారానే ప్రయాణించాల్సి వస్తున్నది. సంబంధిత అధికారులు స్పందించి, రోడ్డుకు మరమ్మతులు చేయాలని గ్రామస్తులు కోరుతున్నారు. నక్కలపల్లి గ్రామానికి వెళ్లేదారిలో గల లోలెవల్ వంతెన కొట్టుకుపోగా, గ్రామ యువకులు శ్రమదానం చేసి, రాకపోకలు సాగేలా చేశారు. వాగుమొత్తం బండలతో నిండిపోయి నడక కూడా సాధ్యం కాకపోతుండడంతో గ్రామస్తులు ఈ నిర్ణయం తీసుకున్నారు.
మందమర్రి పట్టణంలోని రోడ్లన్నీ బురదమయమయ్యాయి. మార్కెట్, పాతబస్టాండ్, యాపల్, అంగడిబజార్, పాలచె ట్టు, ప్రాణహిత కాలనీ ఏరియాల్లోని రోడ్ల పై గుంతల్లో నీరుచేరడంతో వాహనదారులు ఇబ్బందులకు గురయ్యారు. నార్లాపూర్ సమీపంలోని ఇందు గార్డెన్ కాలనీ లో రోడ్లపై నీరు నిలవడంతో ప్రజలు ఇం డ్ల నుంచి బయటకు వచ్చే పరిస్థితి లేకుం డా పోయింది. మున్సిపల్ అధికారులు తమ ఇబ్బందులను గ్రహించి, డ్రైనేజీలను నిర్మించాలని కాలనీవాసులు కోరారు. వర్షాల నేపథ్యంలో మున్సిపల్ కార్యాలయంలో హెల్ప్డెస్క్ను ఏర్పాటు చేసినట్లు మందమర్రి మున్సిపల్ కమిషనర్ వెంకటేశ్వర్లు తెలిపారు. ఏ ప్రమాదం వాటిల్లినా, కాలనీల్లో పెద్ద ఎత్తున నీరు నిలచినా వెంటనే హెల్ప్డెస్క్ 1800425 3611, ల్యాండ్లైన్ 08736293611 నంబర్లకు సమాచారం అందించాలని సూచించారు. వెంటనే తమ సిబ్బంది వచ్చి సహాయసహకారాలు అందిస్తారని తెలిపారు.
కౌటాల మండలంలోని చెరువులు, కుంటలు, వాగులు, ఒర్రెల్లో వరద చేరి నిండుగా ప్రవహిస్తున్నాయి. మండల సరిహద్దు వార్దా, ప్రాణహిత ఉధృతంగా ప్రవహిస్తున్నాయి. తుమ్మిడిహట్టి వద్ద ప్రాణహిత ఒడ్డున గల పుష్కర ఘాట్ మెట్లు మొత్తం మునిగిపోయాయి. అలాగే తాటిపల్లి వద్ద వార్దా నదిలో వరద నీరు చేరి, నిండుగా ప్రవహిస్తుండంతో సమీపంలోని పంట చేనుల్లోకి నీరు చేరుతున్నది.
కాసిపేట మండలం దుబ్బగూడెంకు చెంది న దుర్గమ్మ ఇల్లు పాక్షికంగా దెబ్బతిన్నది. తన బిడ్ద, ఇద్దరు మనుమళ్లతో ఉంటుండ గా, వర్షానికి తడిసి కూలిపోయింది. ఆ సమయంలో వారు పక్క గదిలో ఉండడంతో ప్రమాదం తప్పింది.
సిర్పూర్(టీ) మండలంలోని పలు గ్రామాలకు రాకపోకలు నిలిచిపోయాయి. సిర్పూర్(టీ)-చీలపల్లి గ్రామాలకు వెళ్లే దారిలో కల్వర్టు, చిన్నమాలిని వద్ద లోలెవల్ వంతెనలు వరద దాటికి కొట్టుకుపోయాయి. దీంతో చీలపల్లి, మేడిపల్లి, మాలిని గ్రామాలకు రాకపోకలు నిలిచిపోయాయి. మండలంలోని సిర్పూర్(టీ)-వెంకట్రావ్పేట్ అంతర్రాష్ట్ర వంతెన వద్ద పెన్గంగా ఉధృతంగా ప్రవహిస్తున్నది. పెన్గంగ పరీవాహక ప్రాంత ప్రజలు అప్రమత్తంగా ఉండాలని తహసీల్దార్ శ్రీనివాస్ సూచించారు. ఎంపీడీవో సత్యనారాయణతో కలసి హు డ్కులీ లోలెవల్ వంతెన, వెంకట్రావ్పేట్ అంతర్రాష్ట్ర వంతెనను పరిశీలించారు.
సింగరేణిలోని 20 ఓసీపీల్లో ఉత్పత్తి, ప్రైవేట్ కాంట్రాక్టు సంస్థలకు అప్పగించిన మట్టి తవ్వకాలు, రవాణా పూర్తిగా నిలిచిపోయాయి. శ్రీరాంపూర్ ఓసీపీలో రోజుకు 9 వేల టన్నులు, ఇందారం ఓసీపీలో 3,500 టన్నుల బొగ్గు ఉత్పత్తికి ఆటంకం కలుగుతున్నది. ఏరియాలో 5 రోజుల్లో రూ.4.5 కోట్లు నష్టం వాటిల్లింది. ఓసీపీలో వర్షపు నీటితో చెరువులను తలపిస్తున్నది. యాజమాన్యం మోట్లా సాయంతో ఎప్పటికప్పుడు నీటిని ఉపరితలానికి తరలిస్తున్నది. వర్షాకాలం ప్రభావం చూపకుండా చర్యలు తీసుకుంటున్నామని అధికారులు చెప్పినప్పటికీ, ఫలితాలివ్వలేదని పలువురు అంటున్నారు. ఈ వర్షంతో ఓసీపీల్లో కార్మికులు యంత్రాల మెయింటనెన్స్, ఉపరితలంలోని బంకర్లను రిపేర్ చేస్తున్నారు.