ఇచ్చోడ, ఏప్రిల్ 17: ఆదిలాబాద్ జిల్లా ఇచ్చోడ మండలంలోని ముక్రా(కే) సర్పంచ్ గాడ్గె మీనాక్షికి గ్రామ ఉర్జ స్వరాజ్ విశేష్ పంచాయతీ పురస్కారం, రూ.50 లక్షల రివార్డును కేంద్ర పంచాయతీ రాజ్ శాఖ మంత్రి గిరిరాజ్ సింగ్ అందజేశారు. కేంద్ర పంచాయతీ రాజ్ శాఖ ఆధ్వర్యంలో నిర్వహించిన కార్యక్రమంలో ముఖ్య అతిథిగా రాష్ట్రపతి ద్రౌపది ముర్ము హాజరయ్యారు. దేశంలో నానాజీ దేశ్ముఖ్ స్పెషల్ క్యాటగిరీలో ఈ పురస్కారానికి మూడు గ్రామా లు ఎంపిక కాగా, తెలంగాణ నుంచి ముక్రా(కే) ఒకటి మాత్రమే ఉంది. ఈ సందర్భంగా సర్పంచ్ గాడ్గె మీనాక్షి మాట్లాడుతూ ముఖ్యమంత్రి కేసీఆర్ పథకాల వల్లే ఈ అవార్డు వచ్చిందన్నారు.
రాష్ట్ర ప్రభుత్వం చేపట్టిన పల్లె ప్రగతి కార్యక్రమం గ్రామ స్వరూపం మార్చిందని తెలిపారు. సీఎం నాయకత్వంలో ముక్రా(కే) దేశంలోనే ఆదర్శం గా నిలుస్తున్నదని, అన్ని విభాగాల్లో అగ్రగామిగా నిలవడానికి అవసరమైన అన్ని రకాల సహాయ సహకారాలు, నిధులు, మార్గదర్శకాలు అందజేస్తున్న సీఎం కేసీఆర్కు కృతజ్ఞతలు తెలిపారు. కార్యక్రమంలో కేంద్ర పంచాయతీరాజ్ సహాయ మంత్రి కపిల్ పాటిల్, తెలంగాణ పంచాయతీ రాజ్ శాఖ మంత్రి ఎర్రబెల్లి దయాకర్రావు, అడిషనల్ కలెక్టర్ రిజ్వాన్ బాషా షేక్, డీపీవో శ్రీనివాస్, ఎంపీటీసీ గాడ్గె సుభాష్ పాల్గొన్నారు.