ఆరుగాలం కష్టపడి పండించిన పంటను అమ్ముకునేందుకు రైతాంగం అష్టకష్టాలు పడుతున్నది. ఎన్నో ఆశలతో వరి కోసి కేంద్రాలకు వడ్లు తరలించగా, కొనుగోళ్లు చేపట్టక పోవడంతో నిరీక్షించాల్సి వస్తున్నది. ఇప్పటికే ఆయా కేంద్రాల్లో ధాన్యం కుప్పలు పేరుకుపోగా, సేకరణపై యంత్రాంగం స్పష్టత ఇవ్వకపోవడంతో ఆందోళన చెందుతున్నది. ఇప్పటికే వానలు పడుతుండగా, తడిసిన వడ్లను చూసి కన్నీరు పెడుతున్నది.
మంచిర్యాల, ఏప్రిల్ 13(నమస్తే తెలంగాణ ప్రతినిధి):జిల్లాలో 2023-24 యాంసగి సీజన్లో 275 కొనుగోలు కేంద్రాలు ప్రారంభించినట్లు సివిల్ సప్లయ్ అధికారులు పేపర్లపై లెక్కలు చూపిస్తున్నా, క్షేత్రస్థాయిలో మాత్రం ధాన్యం కొనడం లేదు. ఆయా కేంద్రాల్లో ధాన్యం కుప్పులుగా పేరుకుపోతున్నా, ఇప్పటి వరకు సేకరణ ప్రారంభించలేదు. ప్యాడీ ప్రొక్యూర్మెంట్ సెంటర్లను ప్రారంభించినట్లు ఫొటోలకు ఫోజులివ్వడం తప్ప.. ఒక్క వడ్ల గింజనూ కొన్నది లేదు.
సీరియల్లో ఫస్ట్ ఉంటే.. ఫస్టే కొంటారని రైతులు పది.. పన్నెండు రోజుల క్రితమే ధాన్యం తెచ్చి కేంద్రాల్లో పోయగా, అసలు కొనుగోళ్ల ఊసే ఎత్తడం లేదు. ప్రస్తుతం వర్షాలు పడుతుండడంతో రైతులు లబోదిబోమంటున్నారు. ఆరుగాలం కష్టపడి పండించిన ధాన్యం తడిసిపోతుంటే చూసి కన్నీరు పెడుతున్నారు. గడిచిన పదేళ్లలో ఎప్పుడూ ఇలాంటి పరిస్థితి రాలేదని, వచ్చిన ధాన్యం వచ్చినట్లు కొన్నారని, ఈ ఏడాది మాత్రం అసలు కొనుగోలు కేంద్రాలు ఉన్నాయా.. లేదా.. అనేది కూడా చెబుతలేరని వాపోతున్నారు.
మంచిర్యాల జిల్లాలో డీఆర్డీఏ ఏజెన్సీ ద్వారా 132, పీఏసీఎస్ 106, మెప్మా 6, డీసీఎంఎస్ 31 కేంద్రాలు ఏర్పాటు చేసినట్లు అధికారులు చెబుతున్నారు. గతేడాది జిల్లాలో పీఏసీఎస్ ఆధ్వర్యంలో 130 కేంద్రాలు ఏర్పాటు చేశారు. ఇందులో బెల్లంపల్లిలో 25, చెన్నూర్లో 51, మంచిర్యాలలో 38, ఖానాపూర్లో 16 కేంద్రాలు ఉండేవి. జిల్లాలో డీసీఎంఎస్ ఆధ్వర్యంలో 90 కేంద్రాలు, మంచిర్యాల నియోజకవర్గంలో 47 కేంద్రాలు ఉండాలి. బెల్లంపల్లి, చెన్నూర్ నియోజకవర్గాల్లో డీసీఎంఎస్, పీఏసీఎస్ కేంద్రాలను యథావిధిగా కొనసాగిస్తున్నారు. స్థానిక ఎమ్మెల్యే సూచనల మేరకు కొన్ని కేంద్రాల్లో నిర్వాహకులను మార్చారు.
మంచిర్యాల నియోజకవర్గంలో మాత్రం పీఏసీఎస్ 38, డీసీఎంఎస్ 47 కేంద్రాలకు పర్మిషన్ ఇవ్వలేదు. వీటి స్థానంలో డీఆర్డీఏ ఏజెన్సీ ద్వారా మహిళా సంఘాలతో కొనుగోళ్లు చేస్తామని ఎమ్మెల్యే ప్రేమ్సాగర్రావు చెప్పారు. దీంతో పీఏసీఎస్, డీసీఎంఎస్ ఆధ్వర్యంలో గతంలో కొనుగోలు కేంద్రాలున్న ప్రాంతాల్లో ఇప్పటి వరకు కేంద్రాలు ఏర్పాటు చేయలేదు. అసలు ఈ కేంద్రాలుంటాయా.. లేదా.. అనే విషయంలో స్పష్టత లేదు. ఇప్పటి వరకు మంచిర్యాల నియోజకవర్గంలో ఏ గ్రామంలో.. ఎన్ని కేంద్రాలున్నాయనేది కూడా అధికారులు చెప్పడం లేదు. పోనీ, 275 కేంద్రాలు ఏర్పాటు చేసినట్లు ఇచ్చిన జాబితానైనా ఫైనలనుకుంటే.. అది కూడా ఎటూ తేల్చడం లేదు.
డీసీఎంఎస్, పీఏసీఎస్ ధాన్యం కొనుగోలు కేంద్రాల విషయంలో స్పష్టత లేకపోవడంతో క్షేత్రస్థాయిలో అనేక సమస్యలు వస్తున్నాయి. పోనీ, డీఆర్డీఏ ద్వారా ఐకేపీలకు అప్పగించిన కేంద్రాల్లోనైనా ధాన్యం కొంటున్నారా అంటే అదీ లేదు. కొనుగోలు కేంద్రాలు ఫైనల్ కాకపోవడంతో మిల్లులకు ట్యాగింగ్ చేయలేదు. ఏ కొనుగోలు కేంద్రం నుంచి ఏ మిల్లుకు బియ్యం వెళ్లాలి అనే విషయంలో స్పష్టత లేదు. దీంతో ఐకేపీ ఆధ్వర్యంలో నిర్వహిస్తున్న కేంద్రాలకు మిల్లుల ట్యాగింగ్ షీట్లు రాలేదు. రెండు రోజుల క్రితం గన్నీ సంచులే లేవని, ఇప్పుడిప్పుడే వస్తున్నాయంటూ రైతులు చెబుతున్నారు.
మిల్లుల ట్యాగింగ్ రాకపోతే ధాన్యం కొనే పరిస్థితి లేదు. కొనుగోలు కేంద్రాల్లో కాంటాలు పెట్టడం ఆలస్యమయ్యే కొద్దీ ధాన్యం కుప్పులు తెప్పలుగా పేరుకుపోతుంది. చివరకు కొనుగోలు చేసినా లారీల లోడింగ్, అన్ లోడింగ్ సమస్య వచ్చే అవకాశాలు ఎక్కువగా ఉన్నాయి. గతంలో ఎప్పటి ధాన్యం అప్పుడు కొంటేనే లారీలు దొరక్క రెండు, మూడు రోజుల పాటు కల్లాల్లోనే ఎదురు చూడాల్సి వచ్చేది. ఇప్పుడు అంతా కొనుగోళ్లలో జాప్యం జరుగుతున్నా దృష్ట్యా.. రోజుల తరబడి లారీల కోసం ఎదురు చూడాల్సి వస్తుందేమోనని రైతులు ఆందోళన చెందుతున్నారు. మరి ఇప్పటికైనా అధికారులు ఈ సమస్యలకు పరిష్కారం చూపిస్తారా.. లేదా అనేది వేచి చూడాల్సి ఉంది.
మా ఊరిలో ధాన్యం కొనుగోలు కేంద్రం ఏర్పాటు చేసి 10 రోజులైతంది. వడ్లు ఎప్పుడు కొంటరని నిర్వాహకులను అడిగితే గన్నీ బ్యాగ్లు రాలేదంటున్నరు. మొన్న వర్షం పడ్డది. ఈ రోజు కూడా వర్షం పడ్డది. ధాన్యం మంచిగ ఆరింది. రెండు, మూడు రోజుల సంది మబ్బులు పడుతున్నయి. ఒక్కసారిగా భారీ వర్షం పడితే మా నోట్ల మన్ను పడ్డట్లే. ఇప్పటికైనా వడ్లు కొనాలి. గతేడాది ధాన్యం తెచ్చిన వెంటనే కొన్నరు. ఈసారి ఎందుకిట్ల చేస్తున్నరో అర్థమైత లేదు.
– పెట్టం కమలాకర్, రైతు, లక్ష్మీపూర్