తాంసి(తలమడుగు), జూన్ 4 : ‘పదేండ్లు ఇరాం లేకుండా కరెంట్ వచ్చింది. బోరు వేస్తే పొలం మొత్తం తడిచే వరకు నడుస్తుండే. కరెంట్ పోతదేమో అన్న ముచ్చటే లేకుండే. ఇప్పుడు కరెంట్ ఎప్పుడు వస్తదో.. ఎప్పుడు పోతదో తెలవడం లేదు. రాత్రనక, పగలనక పొలం కాడికి ఉరికే పరిస్థితి వచ్చింది.’ అంటూ ఆదిలాబాద్ జిల్లా తలమడుగు మండలంలోని కుచులాపుర్, పల్సి శివారులోని రైతులు ఆవేదన వ్యక్తం చేస్తున్నారు. పది రోజులుగా కరెంట్ సరఫరా సక్రమంగా లేదని గ్రామస్తులు ఆవేదన వ్యక్తం చేస్తున్నారు. పదేండ్ల కేసీఆర్ ప్రభుత్వంలో ఇలాంటి కష్టాలు ఎప్పుడూ చూడలేదని గుర్తు చేసుకుంటున్నారు. పది రోజులుగా కరెంట్ కష్టాలు ఎక్కువయ్యాయని, తరచూ కరెంట్ పోవడం, రావడంతో మోటర్లు, స్టార్టర్లు కాలిపోతున్నాయని వాపోయారు. ఈ విషయంపై సంబంధిత అధికారులకు ఫోన్ చేసినా ఫలితం ఉండడం లేదని ఆగ్రహం వ్యక్త చేస్తున్నారు. అయితే ఇటీవల ఈదురుగాలులకు కుచులాపుర్, పల్సి శివారులోని పొలాల్లో ఏకంగా పది రోజులుగా త్రీఫేజ్ సౌకర్యం లేకపోవడంతో కూరగాయలు, పంటలు ఎండిపోతున్నాయి.
స్తంభం బిగించారు.. కనెక్షన్ మరిచారు..
రాష్ట్ర ప్రభుత్వం ఆదేశించిన విద్యుత్ అధికారుల పనితీరు మారడం లేదు. మండలంలోని పొన్నారి గ్రామంలో త్రీఫేజ్ సౌకర్యం లేక రైతులు ఇబ్బందులు పడుతున్నారు. విద్యుత్ స్తంభం విరగడంతో మరమ్మతులు చేయాల్సిన అధికారులు స్తంభాన్ని మాత్రం బిగించారు.. కానీ.. కనెక్షన్ ఇవ్వడం మరిచారు. దీంతో ఆ ప్రాంతంలోని రైతులకు త్రీఫేజ్ సరఫరా లేక ఇబ్బందులకు గురవుతున్నామని పేర్కొంటున్నారు. విరిగిన స్తంభాన్ని తీసేసి, బిగించిన స్తంభానికి కనెక్షన్ ఇవ్వాలని రైతులు కోరుతున్నారు. లేదంటే కలెక్టర్ దృష్టికి సమస్యను తీసుకవెళ్తామని హెచ్చరిస్తున్నారు.
రెండెకరాల తోట ఎండింది..
నేను ఎవుసం మొదలు పెట్టి పనులు చేస్తూ పదిహేనేండ్లు అవుతున్నది. ఆ నాటి కరువు మల్లగిప్పుడు వచ్చింది. నీళ్లు లేక రెండెకరాల్లో మా దాదా వేసిన వంకాయలు, కొత్తిమీర, మెంతికూర, పాలకూర తోట ఎండిపోయింది. దాంట్లో లక్షకు పైగా చేతికొచ్చిన పంట నేలపాలైంది. రాబోయే రోజుల్లో ఎట్లుంటదో భయమేస్తున్నది. పొలం ఉండి కూలీ చేస్తూ బతుకుతున్నం. వారం రోజుల్లో కరెంటు లేక తాగడానికి కూడా నీళ్లు లేవు. ఎడ్ల బండి మీద రెండు కిలో మీటర్లు పోయి నీళ్లు తెచ్చుకుంటున్నం.
– తుకారం, వ్యవసాయ కూలీ, కుచులాపుర్
రైతులను పట్టించుకుంటలేరు..
నాకు ఎనిమిదెకరాల పొలం ఉంది. అందులో రెండున్నర ఎకరాల్లో కొత్తిమీర, పాలకూర, మెంతికూర, గంగావాయిల్, తోట కూరలు పండించా. నీళ్లున్నా.. త్రీఫేజ్ కరెంటు లేకపోవడంతో చేతికొచ్చిన రూ.50 వేల కొత్తిమీర పంట ఎండిపోయింది. ఇంకా పాలకూర, మెంతికూర, గంగవాయిల్ పంటలు కూడా ఎండిపోతున్నాయి. కరెంటు సార్లకు ఫోన్ చేసినా పట్టించుకోవడం లేదు. జిల్లా అధికారులు స్పందించి కరెంట్ వచ్చేటట్లు చూడాలి. పదేండ్లలో కరెంటు కష్టాలు లేవు.
– సుకుమార్ పెట్కులే, రైతు, కుచులాపుర్.