హాజీపూర్, జూలై 20 : హాజీపూర్ మండలం ర్యాలీగఢ్పూర్ గ్రామ పంచాయతీ పరిధిలోని దుర్గాదేవి (క్వారీ) జాతరను ఆదివారం అంగరంగ వైభవంగా నిర్వహించేందుకు ఆయల కమిటీ ఏర్పాట్లు చేసింది. యేటా ఆషాఢ మాసంలో క్వారీలోని దుర్గాదేవి ఆలయ వార్షికోత్సవం నిర్వహించడం ఆనవాయితీగా వస్తున్నది. శనివారం రాత్రి భజన కార్యక్రమాలు నిర్వహించనుండగా, ఆదివారం జరిగే జాతరకు భక్తులు వేలాదిగా తరలిరానున్నారు. ప్రకృతి ఒడిలో కొలువైన దుర్గమ్మ తల్లికి భక్తులు అత్యంత భక్తిశ్రద్ధలతో మొక్కులు చెల్లించుకోనున్నారు. అమ్మవారి ఆలయం ఎదుట వాహనాలకు పూజలు నిర్వహించి కోళ్లు, మేకలను బలి ఇచ్చి సహపంక్తి భోజనాలు చేస్తారు. మంచిర్యాల బస్టాండ్ నుంచి జాతర వరకు ఉదయం నుంచచి ఆర్టీసీ బస్సులను నడుపనున్నారు. మంచిర్యాల డీసీపీ భాస్కర్, ఏసీపీ ప్రకాశ్, మంచిర్యాల సీఐ బన్సీలాల్ ఆధ్వర్వంలో భారీ బందోబస్తు ఏర్పాటు చేయనున్నారు.