హాజీపూర్, జూలై 14 : కేంద్ర, రాష్ట్ర ప్రభుత్వాల నుంచి రావాల్సిన ఆర్థిక సంఘాల నిధులు రాక పోవడంతో గ్రామ పంచాయతీల్లో అభివృద్ధి పనులు ముందుకుసాగడం లేదు. ప్రభుత్వాల నుంచి నెలల తరబడి నిధులు విడుదల కాకపోవడంతో ఆదాయ వనరులు లేని చిన్న గ్రామ పంచాయతీల ఆర్థి క పరిస్థితి ఇబ్బందికరంగా మారింది. అరకొ రగా వస్తున్న ఆదాయంతో మేజర్ గ్రామ పం చాయతీల్లో పనులను నెట్టుకొస్తున్నారు. మరికొన్ని గ్రామాల్లో పంచాయతీ కార్యదర్శు లు సొంతంగా డబ్బులు ఖర్చు పెట్టి పనులు చేపడుతున్నారు. మంచిర్యాల జిల్లాలో 311 గ్రామ పంచాయతీలు ఉన్నాయి.
కొన్ని నెలలుగా కేంద్ర ప్రభుత్వం నుంచి రావాల్సిన 15వ ఆర్థిక సంఘం నిధులతో పాటు రాష్ట్ర ఆర్థిక సంఘం నిధులు సైతం గ్రామ పంచాయతీలకు విడుదల కావడం లేదు. విద్యుత్ బిల్లులు, కార్మికుల వేతనాలు, వీధి దీపాల నిర్వహణ, ట్రాక్టర్ డీజిల్, తాగు నీటి మోటర్ల మరమ్మతులతో పాటు వివిధ పనుల నిర్వాహణ భారంగా మారింది. మేజర్ గ్రామ పంచాయతీల వారికి వస్తున్న ఆదాయంతో పూర్తి స్థాయిలో పనులు జరగడం లేదు. చిన్న గ్రామ పంచాయతీల్లో ఆదాయం రాక పనులు సాగక పాలన స్తంభించింది.
2023 నవంబర్ నుంచి కేంద్ర ప్రభుత్వం నుంచి రావాల్సిన 15వ ఆర్థిక సంఘం విడుదల కావడం లేదు. ఈ నిధులు మూడు నెలలకోసారి విడుదల అవుతుండగా మేజర్ గ్రామ పంచాయతీలకు దాదాపు రూ.20 లక్షల నుంచి రూ.30 లక్షల వరకు, చిన్న గ్రామ పంచాయతీలకు రూ.10 లక్షల నుంచి రూ.15 లక్షల వరకు నిధులు అందుతాయి. రాష్ట్ర ప్రభుత్వం నుంచి రావాల్సిన ఆర్థిక సంఘం నిధులు 2022 అక్టోబర్ నుంచి నేటి వరకు 24 నెలలు (రెండేళ్లు)గా విడుదల కావడం లేదు. గత ప్రభుత్వం పంచాయతీరాజ్ శాఖకు నిధుల కేటాయింపులు అధికంగా కేటాయించామని చెబుతుండగా మరి రెండేళ్లుగా గ్రామ పంచాయతీలకు రావాల్సిన నిధులు ఎక్కడికి వెళ్లినట్లు అని పలువురు ప్రశ్నిస్తున్నారు.
నిధుల లేమితో గ్రామ పంచాయతీ కార్యదర్శులు ఇబ్బందుల మధ్య గ్రామాల్లో పనులు చేయిస్తున్నారు. గ్రామంలో తాగు నీటి సరఫరా, వీధి దీపాల నిర్వహణ విషయంలో గ్రామ పంచాయతీ కార్యదర్శులు సొంత డబ్బులను వెచ్చిస్తూ పనులు చేయిస్తున్నారు. వర్షాకాలం నేపథ్యంలో ఉన్నాతాధికారులు అప్రమత్తంగా ఉండాలనే ఆదేశాల మేరకు పారిశుధ్య పనుల నిర్వహణ భారం పంచాయతీ కార్యదర్శులపై పడుతున్నది. ఇటీవల రాష్ట్ర ప్రభుత్వం బదిలీలకు గ్రీన్ సిగ్నల్ ఇచ్చింది. అప్పులు తీసుకరావడంతో పాటు సొంతంగా డబ్బులు ఖర్చు పెట్టి చేసిన పనులకు సంబంధించిన బిల్లులు రాకపోవడంతో బదిలీ అయితే ఎలా అని కార్యదర్శులు ఆందోళన చెందుతున్నారు. వర్షాకాలం కావడంతో ఇటు పారిశుధ్య పనులు, గ్రామ పంచాయతీల నిర్వహణ భారం తమపై పడకుండా నిధుల లేమి, నిధుల కొరతపై ఉన్నతాధికారులు ప్రభుత్వం దృష్టికి తీసుకపోయి నిధులను మంజూరు చేయించాలని పంచాయతీ కార్యదర్శులు కోరుతున్నారు.
కేంద్ర ప్రభుత్వం నుంచి రావాల్సిన 15వ ఆర్థిక సంఘం నిధులు, రాష్ట్ర ప్రభుత్వం నుంచి రావాల్సిన ఆర్థిక సంఘం నిధులు 2023 సెప్టెంబర్ నుంచి విడుదల కాలేదు. కొన్ని గ్రామ పంచాయతీల్లో సర్పంచ్లు, పంచాయతీ కార్యదర్శులు సొంతంగా డబ్బులు పెట్టి పనులను చేశారు. గ్రామ పంచాయతీలకు ప్రత్యేక అధికారులు ఉన్నారు. సర్పంచ్లు, పంచాయతీ కార్యదర్శులు సొంత డబ్బులు పెట్టిన వారు బిల్లులు పెడితే నిధులు రాగానే వారికి చెల్లిస్తాం.
– వెంకటేశ్వర్రావు, జిల్లా పంచాయతీ అధికారి, మంచిర్యాల