ఆదిలాబాద్, జూలై 11(నమస్తే తెలంగాణ) : రైతుభరోసా పథకం అమలులో భాగంగా ప్రభుత్వం ఏర్పాటు చేసిన కేబినెట్ సబ్కమిటీ సభ్యులు, మంత్రులు భట్టి విక్రమార్క, తుమ్మల నాగేశ్వర్రావు, పొంగులేని శ్రీనివాస్రెడ్డిలను రైతులకు మేలు చేసే నిర్ణయాలు తీసుకోవాలని ఉమ్మడి ఆదిలాబాద్ జిల్లా ఎమ్మెల్యేలు కోరారు. గురువారం ఆదిలాబాద్ జిల్లా ఉట్నూర్లోని కుమ్రం భీం కాంప్లెక్లో రైతు భరోసా పథకంపై జరిగిన విస్తృతస్థాయి సమావేశంలో ఎమ్మెల్యేలు తమ అభిప్రాయాలను సబ్కమిటీ ఎదుట వెల్లడించారు. బోథ్ ఎమ్మెల్యే అనిల్ జాదవ్ మాట్లాడుతూ.. పది ఎకరాల వరకు రైతుబంధు ఇవ్వాలని రైతులు సూచిస్తున్నా, వారు తమ మనసులో వేరే ఆలోచన లేకుండా అభిప్రాయాన్ని తెలియజేయాలన్నారు.
వర్షాలు ఎక్కువ పడినా, వానలు లేకున్నా రైతులు పంటలు నష్టపోతారని, ఇతర జిల్లాలతో పోల్చితే ఆదిలాబాద్ జిల్లా రైతులు పదెకరాల భూమి ఉన్నా పేదవారుగా ఉన్నారన్నారు. రైతుభరోసా విషయంలో ప్రత్యక మినహాయింపు ఇవ్వాలని కోరారు. కుఫ్టీ ప్రాజెక్టు నిర్మాణం వల్ల బోథ్ నియోజకవర్గం సస్యశ్యామలంగా మారుతుందని, ప్రాజెక్టు నిర్మాణానికి ప్రభుత్వం చర్యలు తీసుకోవాలని విన్నవించారు. ఆసిఫాబాద్ ఎమ్మెల్యే కోవ లక్ష్మి మాట్లాడుతూ.. కేసీఆర్ ప్రారంభించిన రైతుబంధు పథకం ఇప్పడు రైతు భరోసాగా మారిందన్నారు. భూస్వాములకు కాకుండా అర్హులైన వారికి రైతుబంధు ఇవ్వాలని, రైతుబీమా పథకాన్ని కొనసాగించాలని సూచించారు. ఏజెన్సీ ప్రాంతాల్లోని గిరిజనేతర రైతుల సమస్యలను పరిష్కరించాలని కోరారు.
రైతుభరోసా పథకంలో భాగంగా సాగు భూ ములకు కోతలు విధించవద్దని ఆదిలాబాద్ ఎమ్మెల్యే పాయల్ శంకర్ సూచించారు. జిల్లా రైతంగాన్ని ప్రత్యేకంగా పరిగణించాలని, ఇత ర జిల్లాల రైతుల మాదిరి చూడవద్దని తెలిపారు. రైతులు పండించిన పంటలకు ఫసల్ బీమా వర్తింపచేయాలని, ప్రభుత్వం ప్రీమి యం చెల్లించాలని కోరారు. మంచిర్యాల ఎమ్మెల్యే ప్రేమ్సాగర్రావు మాట్లాడుతూ.. జాబ్కార్డులు ఉన్న రైతు కూలీలకు ప్రభుత్వం ఇచ్చిన హామీలను అమలు చేయాలని, అటవీ భూముల సమస్య పరిష్కారానికి చర్యలు తీసుకోవాలన్నారు. సిర్పూర్ ఎమ్మెల్యే పాల్వాయి హరీశ్ మాట్లాడుతూ.. పోడు భూముల్లో అటవీ శాఖ అధికారులు ప్లాంటేషన్ చేస్తూ ఇబ్బందులు పెడుతున్నారని తెలిపారు.
ఎన్నో ఏళ్లుగా రైతులు సాగు చేస్తున్న భూముల్లో పోలీసు బందోబస్తు మధ్య మొక్కలు నాటుతున్నారని, ఈ సమస్యను పరిష్కరించాలని కోరారు. పంటలకు బోనస్ చెల్లించాలని సూచించారు. ఖానాపూర్ ఎమ్మె ల్యే వెడ్మ బొజ్జు మాట్లాడుతూ.. కొందరు అధికారులు ప్రభుత్వాన్ని బదనాం చేయాలని చూస్తున్నారని, పోడు భూముల సమస్య పరిష్కారానికి చర్యలు తీసుకోవాలని కోరారు. ఈ సమావేశంలో ఆదిలాబాద్, నిర్మల్ కలెక్టర్లు రాజర్షి షా, అభిలాష అభినవ్, ఐటీడీఏ పీవో ఖుష్బూ గుప్తా, ఉమ్మడి జిల్లా రైతులు, వివిధ శాఖల అధికారులు పాల్గొన్నారు.