కాగజ్నగర్, జూలై 12: సీజనల్ వ్యాధులు ప్రబలకుండా తగు చర్యలు తీసుకోవాలని కాగజ్నగర్ మున్సిపల్ అధికారులు, సిబ్బందిని కుమ్రం భీం ఆసిఫాబాద్ కలెక్టర్ వెంకటేశ్ ధోత్రే ఆదేశించారు. కాగజ్నగర్ పట్టణంలో నిర్వహించిన ఫ్రైడే- డ్రై డే కార్యక్రమాన్ని కలెక్టర్ పరిశీలించారు. పలు వార్డుల్లో పర్యటించి దోమల నివారణపై పలు సూచనలు చేశారు. ఇంటి పరిసరాల్లోని పూల కుండీల్లో నీళ్లు, కుండలు, టైర్లలో ఉన్నా వృథా నీటిని తొలగించారు. ఈ సందర్భంగా ఆయన మాట్లాడుతూ ప్రజలందరూ ప్రతి శుక్రవారం ఫ్రైడే- డ్రైడే కార్యక్రమాన్ని నిర్వహించాలని, దోమల నివారణకు, లార్వా ఆవాసమైన మురుగు నీటిని తొలగించాలన్నారు. ఇంటి పరిసరాలను శుభ్రంగా ఉంచుకోవాలని సూచించారు. ఈ కార్యక్రమంలో అదనపు కలెక్టర్ దీపక్ తివారీ, ఆర్డీవో సురేశ్, తహసీల్దార్ కిరణ్కుమార్, మున్సిపల్ కమిషనర్ అంజయ్య, మున్సిపల్ సిబ్బంది క్రాంతి, ఆయా వార్డుల కౌన్సిలర్లు, మున్సిపల్ సిబ్బంది, మెప్మా సిబ్బంది పాల్గొన్నారు.
కాగజ్ మండలంలోని భట్టుపల్లి ప్రభుత్వ దవాఖానను కలెక్టర్ వెంకటేశ్ ధోత్రేతో పాటు అదనపు కలెక్టర్ దీపక్ తివారీ తనిఖీ చేశారు. దవాఖానలోని వార్డులు, ఫార్మసీ, రిజిష్టర్లను పరిశీలించారు. రోగులకు మెరుగైన వైద్య సేవలు అందించాలని, మందులు అందుబాటులో ఉంచాలని వైద్యులు, సిబ్బందిని ఆదేశించారు. విష జ్వరాలు, అంటు వ్యాధుల నివారణపై ప్రజలకు అవగాహన కల్పించాలన్నారు. ఆశ, ఆరోగ్య కార్యకర్తలు, అంగన్వాడీ సిబ్బందితో ఇంటింటికీ వెళ్లి ప్రజల ఆరోగ్య పరిస్థితులపై వివరాలు తెలుసుకోవాలని ఆదేశించారు.
నిషేధిత ఎరువులు, నకిలీ విత్తనాలు విక్రయిస్తే కఠిన చర్యలు తీసుకుంటామని డీలర్లను కలెక్టర్ వెంకటేశ్ ధోత్రే హెచ్చరించారు. కాగజ్నగర్లోని ఎరువులు దుకాణాలను అదనపు కలెక్టర్ దీపక్ తివారీతో కలిసి శుక్రవారం తనిఖీ చేశారు. రికార్డు రిజిష్టర్లు, ఎరువుల, విత్తనాల నిల్వలను పరిశీలించారు. రికార్డుల నిర్వహణపై నిర్లక్ష్యం చేయవద్దన్నారు. ధరల పట్టికను ఏర్పాటు చేయాలన్నారు. ఆయన వెంట ఏవో రామకృష్ణ, వ్యవసాయ శాఖ సిబ్బంది ఉన్నారు.