హాజీపూర్, మే 31 : పచ్చిరొట్ట, పత్తి విత్తనాల పంపిణీ ప్రక్రియ పకడ్బందీగా నిర్వహించాలని కలెక్టర్ బదావత్ సంతోష్ అన్నారు. శుక్రవారం హాజీపూర్ మండలం పడ్తన్పల్లిలోని ప్రాథమిక వ్యవసాయ సహకార పరపతి సం ఘాన్ని ఆకస్మికంగా తనిఖీ చేశారు. పచ్చి రొట్ట విత్తనాల పంపిణీ విధానాన్ని పరిశీలించారు. కలెక్టర్ మాట్లాడుతూ ప్రభుత్వం ద్వారా 60 శాతం రాయితీపై పచ్చిరొట్ట విత్తనాలను పంపిణీ చేస్తున్నట్లు తెలిపారు. ఆన్లైన్లో టీ-సీడ్ పోర్టల్ ద్వారా పంపిణీ జరుగుతున్న విధానం, స్టాక్ వివరాలను పరిశీలించారు.
పచ్చిరొట్ట వల్ల కలిగే ప్రయోజనాన్ని రైతులకు వివరించారు. అనంతరం మల్లిఖార్జున ఫర్టిలైజర్ దుకాణాన్ని తనిఖీ చేసి పత్తి విత్తనాలు, ఎరువుల స్టాక్ వివరాలను పరిశీలించారు. నకిలీ, నిషేధిత విత్తనాలు, ఎరువులను అమ్మితే చర్యలు తప్పవని హెచ్చరించారు. ఈ కార్యక్రమంలో జిల్లా వ్యవసాయ శాఖ సాంకేతిక అధికారి సంకె శ్రీనివాస్, మండల వ్యవసాయ శాఖ అధికారి కృష్ణ, ప్రాథమిక వ్యవసాయ శాఖ పరపతి సంఘం కార్యనిర్వహణాధికారి, రైతులు, తదితరులు పాల్గొన్నారు.
నస్పూర్, మే 31 : ఈ నెల 25 నుంచి 28వ తేదీ వరకు మలేషియాలో జరిగిన అంతర్జాతీయ శిలంబం ఓపెన్ చాంపియన్షిప్ పోటీల్లో జిల్లా క్రీడాకారులు పులిశెట్టి శృతి, దొంతుల వర్ష గోల్డ్, సిల్వర్మెడల్స్ సాధించిన విషయం విదితమే.
ఈ మేరకు శుక్రవారం కలెక్టరేట్లో కలెక్టర్ బదావత్ సంతోష్ వారిని అభినందించారు. అంతర్జాతీయ స్థాయిలో రాణించి జిల్లాకు పేరు తేవడం గర్వంగా ఉందని, మున్ముందు మరింత ఉన్నత స్థాయికి చేరుకోవాలని కలెక్టర్ ఆకాంక్షించారు. కార్యక్రమంలో శిలంబం రా్రష్ట్ర కార్యదర్శి కనర్తి రమేశ్, పర్యవేక్షకుడు వెంకటేశ్వర్రావు, డీవైఎస్వో రాజ్వీర్, ఈడీ దుర్గా ప్రసాద్, వెంకటేశ్ పాల్గొన్నారు.