రామకృష్ణాపూర్, జూన్ 5 : మంచిర్యాల జిల్లాలోని మందమర్రి మండలం బొక్కలగుట్ట గ్రామ సమీపంలోని గాంధారి ఖిల్లా వద్ద అటవీ ప్రాంతం మిడిచెరువు కట్టపై పులి దాడిలో చుక్కల దుప్పి మృతి చెందినట్లు తెలిసింది. బుధవారం ఉపాధి హామీ పనులకు కూలీలకు చుక్కల దుప్పి కనిపించడంతో అధికారులకు సమాచారం అందించారు. వెంటనే లక్షెట్టిపేట్ ఎఫ్ఆర్వో నగావత్ స్వామి, మేడారం, గఢ్పూర్, పాత మంచిర్యాల సెక్షన్ సిబ్బంది, పశువైద్యాధికారులు అక్కడికి వెళ్లి కళేబరాన్ని పరిశీలించి, పంచనామా నిర్వహించారు.
చెరువు కింద ఉన్న చెలిమ వద్దకు నీటి కోసం వచ్చిన చుక్కల దుప్పిని పులి చంపి ఉంటుందని గ్రామస్తులు తెలిపారు. ఈ విషయంపై లక్షెట్టిపేట్ ఎఫ్ఆర్వో నగావత్ స్వామిని వివరణ కోరగా నీటి కోసం వచ్చిన దుప్పిని రేసుకుక్కలు చంపి ఉంటాయని తెలిపారు. పులి ఆనవాళ్లు ఇక్కడ కనిపించలేదని తెలిపారు. మూడు నెలల క్రితం ఇక్కడ చిరుత పులి సంచరించినప్పటికీ ప్రస్తుతం ఎలాంటి ఆనవాళ్లు కనిపించలేదని తెలిపారు. ఆయన వెంట బీట్ ఆఫీసర్ రత్న సింధు, సెక్షన్ ఆఫీసర్లు అత్తహుల్లా, హమ్మద్ ఉన్నారు. గాంధారి ఖిల్లా అటవీ ప్రాంతంలో చుక్కల దుప్పి మృతితో పులి సంచరిస్తున్నదనే ప్రచారం జరగడంతో సమీప గ్రామాల ప్రజలు ఆందోళన చెందుతున్నారు.