కోటపల్లి, మే 11 : కాంగ్రెస్ ప్రభుత్వ పాలన అస్తవ్యస్తంగా మారిందని, లక్షల ఎకరాల్లో పంటలు ఎండిపోయాయని, రైతుల ఆత్మహత్యలు కొనసాగుతున్నా పట్టించుకునే నాథుడే కరువయ్యాడని పెద్దపల్లి బీఆర్ఎప్ ఎంపీ అభ్యర్థి కొప్పుల ఈశ్వర్ అన్నారు. శనివారం చెన్నూర్ పట్టణంలో నిర్వహించిన ప్రజా ఆశీర్వాద సభలో ఆయన మాట్లాడారు. మోసపూరిత హామీలతో గద్దెనెక్కిన కాంగ్రెస్.. పాలనలో పూర్తిగా వైఫల్యం చెందిందన్నారు.
ఆరు గ్యారెంటీల్లో ఏ ఒక్క హామీని అమలు చేయలేక చేతులెత్తేసిందని మండిపడ్డారు. ప్రభుత్వం మారితే పాలన మెరుగుపడాలి గాని.. మరుగున పడిపోతున్నదన్నారు. బీఆర్ఎస్ అధినేత కేసీఆర్ పిడికిలి బిగించి ప్రజల పక్షాన పోరాడేందుకు సిద్ధంగా ఉన్నారని, పార్లమెంట్ ఎన్నికలే ఇందుకు పునాది కావాలన్నారు. సింగరేణి కార్మికుడిగా సాధారణ జీవితం ప్రారంభించిన తనకు ఈ ప్రాంతంపై గట్టి పట్టుందని, ప్రజలు ఎంపీగా ఆశీర్వదిస్తే సింగరేణి కార్మికులు, ప్రజల సమస్యలపై పార్లమెంట్లో పోరాడుతానని తెలిపారు. ఆస్తుల రక్షణ కోసం వచ్చే నాయకులను నమ్మొద్దని, అవసరం కోసం పార్టీలు మారే గడ్డం ఫ్యామిలీకి తగిన బుద్ధి చెప్పాలని కోరారు.