నస్పూర్, మార్చి 4 : ప్రజావాణిలో అందిన ప్రతీ దరఖాస్తును క్షుణ్ణంగా పరిశీలించి, సంబంధిత శాఖల అధికారుల సమన్వయంతో పరిష్కరించే దిశగా చర్యలు తీసుకోవడం జరుగుతుందని కలెక్టర్ బదావత్ సంతోష్ అన్నారు. కలెక్టరేట్లో సోమవారం నిర్వహించిన ప్రజావాణిలో అదనపు కలెక్టర్ రాహుల్, మంచిర్యాల, బెల్లంపల్లి ఆర్డీవోలు రాములు, హరికృష్ణతో కలిసి అర్జీదారుల నుంచి దరఖాస్తులు స్వీకరించారు. ఈ సందర్భంగా చెన్నూర్, మాదారం, క్యాతనపల్లి, నస్పూర్, చంద్రవెల్లి, కోటపల్లి, భీమారం, జెండా వెంకటాపూర్, దుగ్నేపల్లి, కన్నెపల్లి, మంచిర్యాల, హాజీపూర్, ముల్కల, పెర్కపల్లి, చిత్తాపూర్, నెన్నెల, కాసిపేట తదితర ప్రాం తాల నుంచి వచ్చిన ప్రజలు, తమ సమస్యలపై అర్జీలు పెట్టుకున్నారు. ఈ సందర్భంగా కలెక్టర్ మాట్లాడుతూ.. ప్రజావాణిలో 71 దరఖాస్తులు అందాయన్నారు. వీటిపై సమగ్ర విచారణ జరిపి, పరిష్కరించే దిశగా సంబంధిత అధికారుల సమన్వయంతో చర్యలు తీ సుకుంటామని తెలిపారు. ఈ కార్యక్రమంలో సంబంధిత అధికారులు పాల్గొన్నారు.
బెల్లంపల్లి/వేమనపల్లి/తాండూర్/భీమారం/కోటపల్లి, మార్చి 4 : జిల్లాలోని ఆయా మండలాల్లో ప్రజావాణి నిర్వహించారు. బెల్లంపల్లిలో తహసీల్దార్ ప్రసాద్ ప్రజల నుంచి అర్జీలు స్వీకరించారు. ఇక్కడ 6 దరఖాస్తులు వచ్చినట్లు తెలిపారు. వేమనపల్లి ఎంపీడీవో కార్యాలయంలో ప్రజావాణి నిర్వహించినట్లు తహసీల్దార్ రమేశ్ తెలిపారు. ధరణి పోర్టల్లో 93 దరఖాస్తులు పెండింగ్లో ఉండగా, ఇప్పటి వరకు 25 పరిష్కరించినట్లు చెప్పారు. 9వ తేదీలోగా అన్నీ పరిష్కరిస్తామని తెలిపారు. ఇక్కడ ఎంపీవో శ్రీపతి బాపురావు, ఏపీఎం ఉమారాణి, ఐసీడీఎస్ సూపర్ వైజర్ సువర్ణ, ఏపీవో సత్య ప్రసాద్, మండలస్థాయి అధికారులు పాల్గొన్నారు. తాండూర్ ఎంపీడీవో కార్యాలయంలో ఎంపీడీవో పీ శ్రీనివాస్ ఆధ్వర్యంలో ప్రజావాణి నిర్వహించారు. వివిధ శాఖల అధికారులు హాజరయ్యారు. భీమారం ఎంపీడీవో కార్యాలయంలో 2 దరఖాస్తులు వచ్చినట్లు ఎంపీడీవో రాధ రాథోడ్ తెలిపారు. కాగా, ఇక్కడ అన్ని శాఖల అధికారులు హాజరుకాలేదు. ఒకరిద్దరు మాత్రమే రాగా, దీనిపై వివరణ కోరేందుకు ఎంపీడీవోను ‘నమస్తే’ ఫోన్లో సంప్రదించగా, స్వీచ్ ఆఫ్ అని వచ్చింది. కాసిపేటలో నిర్వహించిన ప్రజావాణిలో కోమటిచేను శివారులోని సల్పాలవాగు ప్రాజెక్టు ఎడమ కాలువ నిర్మించాలని కోమటి చేను రైతులు తహసీల్దార్ భోజన్నకు దరఖాస్తు చేసుకున్నారు. 2005లో సవ్పాలవాగు చెరువు పూర్తి చేశారని, చెరువు కింద 3200 ఎకరాల సాగు భూమి ఉందని, ఎడుమ కాలువ నిర్మాణం చేపట్టపోవడంతో గుంట భూమికీ సాగు నీరు అందడం లేదని తెలిపారు. కోటపల్లి ఎంపీడీవో కార్యాలయంలో నిర్వహించిన ప్రజావాణిలో ఎంపీడీవో ఆకుల భూమన్న అర్జీలు స్వీకరించారు. ఎంపీవో అక్తర్ మోహినొద్దీన్, ఏవో మహేందర్, ఆర్డబ్ల్యూఎస్ జేఈ బద్రినాథ్ స్వామి, పశువైద్యాధికారి పవన్ కుమార్ తదితరులు పాల్గొన్నారు.
ప్రజలు సమస్యలు విన్నవించుకుంటే అక్కడికక్కడే సంబంధిత శాఖల జిల్లా అధికారులతో మాట్లాడించి పరిష్కరించేందుకు అందరు అధికారుల సమక్షంలో కలెక్టరేట్లో ప్రతీ సోమవారం ప్రజావాణి నిర్వహిస్తున్నారు. కానీ.. అది అధికారులు పడుకునేందుకు.., ముచ్చట్లు పెట్టుకునేందుకు అడ్డాగా మారిందని చెప్పేందుకు ‘నమస్తే’ తీసిన ఈ ఫొటోలే నిదర్శనం. కలెక్టర్, అదనపు కలెక్టర్లు పలుమార్లు హెచ్చరించినా వారి తీరు మారడం లేదు. కొందరు ప్రజావాణికి డుమ్మా కొడుతుంటే మరికొందరు వచ్చి ఇలా కాలయాపన చేస్తున్నారని తీవ్ర విమర్శలు వెల్లువెత్తుతున్నాయి.