ఆదిలాబాద్, మే 27 ( నమస్తే తెలంగాణ) : ఆదిలాబాద్, నిర్మల్ జిల్లాల్లో సోమవారం ఎండ దంచికొట్టింది. ఆదిలాబాద్ జిల్లాలో గరిష్ఠంగా 45.2, నిర్మల్ జిల్లాలో 44.6 డిగ్రీల ఉష్ణోగ్రతలు నమోదయ్యాయి. ఉదయం ఏడింటికే భానుడు భగభగ మండగా, సాయంత్రం ఏడింటి దాకా ఉక్కపోత ఉక్కిరిబిక్కిరి చేసింది. అత్యవసర పరిస్థితుల్లో తప్ప ప్రజలు ఇండ్ల నుంచి బయటకు రాలేదు. మధ్యాహ్నం రోడ్లన్నీ నిర్మానుష్యంగా మారాయి. కొన్ని ప్రాంతాల్లో కర్ఫ్యూ వాతావరణం కనిపించింది. ప్రజానీకం శీతల పానీయాలను ఆశ్రయించడంతో పాటు ఉక్కపోత నుంచి ఉపశమనం పొందేందుకు కూలర్లు, ఏసీలను విపరీతంగా వాడుతుండగా, విద్యుత్ వినియోగం పెరిగింది. భానుడు నిప్పుల కుంపటిని తలపిస్తుండగా వృద్ధులు, చిన్నారుల ఆరోగ్యంపై తీవ్ర ప్రభావం చూపుతున్నది. మూగజీవాల పరిస్థితి దయనీయంగా ఉంది. మరికొన్ని రోజులు ఇదే పరిస్థితి ఉండగా, ప్రజల్లో ఆందోళన కనిపిస్తున్నది.
ముందు జాగ్తత్తలే మేలు
వేసవిలో వడదెబ్బ నుంచి రక్షించకోవడానికి ప్రతి ఒకరూ జా గ్రత్తలు తీసుకోవాలని వైద్యులు సూచిస్తున్నారు. తలనొప్పి, కం డరాలు పట్టేయడం, వికారం, కళ్లుతిగడం, వాంతులు చేసుకోవడంవంటి లక్షణాలు కనిపిస్తే వెంటనే వైద్యులను సంప్రదించాలని సూచిస్తున్నారు. ప్రతిరోజూ 5 నుంచి 6 లీటర్ల నీటిని తా గాలని, శీతల పానీయాలకు బదులు మజ్జిగ, నిమ్మ, కొబ్బరి బోండాలు, పుచ్చకాయలు, తాటి ముంజలు, దోసకాయ, లస్సీ, పండ్ల రసాలు తాగడం ఉత్తమమని సూచిస్తున్నారు. బైక్ మీద వెళ్లేటప్పుడు హెల్మెట్ తప్పనిసరిగా ధరించాలని,పిల్లలు, వృద్ధులు, అనారోగ్యంతో ఉన్నవారు, తప్పనిసరి పరిస్థితుల్లో గొడుగు పట్టుకొని వెళ్లాలని సూచిస్తున్నారు. వడదెబ్బ తగిలితే ఓఆర్ఎస్ను తాగించాలని, అది దొరకని పరిస్థితుల్లో నీటిలో ఉప్పు లేదా పంచదారా వేసి తాగాలని, అపస్మారక స్థితిలోకి వెళ్తే నీరు తాగించకుండా వీలైనంత త్వరగా దవాఖానకు తరలించాలని డాక్టర్లు చెబుతున్నారు.