మంచిర్యాల అర్బన్, జూలై 12: మంచిర్యాల జిల్లా కేంద్రంలోని మార్కెట్ రోడ్డులో ఉన్న ప్రముఖ జ్యువెల్లరీ యజమానులు పట్టణ వాసుల నుంచి సుమారు రూ.10 నుంచి 12కోట్ల వరకు అప్పులు తీసుకొని ఎగ్గొట్టి రాత్రికి రాత్రి కుటుంబంతో ఉడాయించిన ఘటన జిల్లా వ్యాప్తంగా చర్చనీయాంశమైంది. స్థానికులు తెలిపిన వివరాల ప్రకారం.. మంచిర్యాల పట్టణంలోని మార్కెట్రోడ్డులో ఉన్న తుకారాం జ్యువెల్లర్స్ ను నాందేవ్, అతని కుమారుడు అమర్ నిర్వహిస్తున్నారు. పట్టణవాసుల నుంచి కోట్లాది రూపాయలు అప్పులు తీసుకొని స్టాక్ మార్కెట్లో పెట్టుబడులు పెట్టారు. మొదట్లో బాగానే కలిసివచ్చినా ఆ తర్వాత నష్టాల్లో కూరుకపోయారు. వీరికి అప్పులు ఇచ్చిన వారు తిరిగి డబ్బులను చెల్లించాలని ఒత్తిడి చేస్తుండగా ఏడాదిగా వారు పొంతనలేని సమాధానాలు చెబుతూ వచ్చారు.
బుధవారం రాత్రి దుకాణానికి తాళం వేసి కుటుంబ సభ్యులతో సహా ఉడాయించారు. విషయం తెలుసుకున్న బాధితులు మంచిర్యాల బులియన్ మర్చంట్ అసోసియేషన్ వారి వద్దకు వెళ్లి సంప్రదించినట్లు సమాచారం. ఈ విషయంపై బులియన్ మర్చంట్ అధ్యక్షుడు సింహరాజు శ్రీనివాస్ను వివరణ కోరగా విషయం వాస్తవమేనని, బాధితులు వచ్చి అప్పులు ఇచ్చిన వివరాలు చెప్పారని తెలిపారు. బాధితుల పక్షాన పట్టణ పోలీస్ స్టేషన్కు వెళ్లి ఫిర్యాదు చేయనున్నట్లు తెలిపారు. ఈ విషయంపై పట్టణ సీఐ బన్సీలాల్ను వివరణ కోరగా ఇంతవరకూ ఎవరూ ఫిర్యాదు చేయలేదని తెలిపారు.